जळगाव : येथील शासकीय वैद्यकीय महाविद्यालय व रुग्णालयात (जीएमसी) चोपडा शहरातील एका महिलेला दहा दिवसांपूर्वी चक्क ‘तिळे’ म्हणजे तीन मुले जन्माला आले होते. डॉक्टरांनी अत्यंत गुंतागुंतीची असलेली शस्त्रक्रिया करून महिलेची सुखरूप प्रसूती केली. रविवारी (ता. १४) महिलेसह तिन्ही बाळांना अधिष्ठाता डॉ. जयप्रकाश रामानंद यांच्या हस्ते साडी, फळे, शक्तिवर्धक औषधे देऊन रुग्णालयातून निरोप देण्यात आला. महिलेच्या तिन्ही बाळांना केशरी, पांढरा, हिरव्या रंगाचे कपडे घालून ‘तिरंगी’ सादरीकरण करून निरोप देण्यात आला. (Latest Marathi News)

संबंधित महिलेची प्रकृती अत्यंत गुंतागुंतीची होती. डॉक्टरांनी वैद्यकीय कौशल्य वापरून महिलेची यशस्वी शस्त्रक्रिया करून तिन्ही सुमारे २ किलो वजन असणाऱ्या बाळांना सुखरूपपणे बाहेर काढले. महिलेची प्रकृती सुधारल्यानंतर तसेच बाळांची प्रकृती उत्तम झाल्यावर निरोप देण्यात आला. वैद्यकीय अधीक्षक डॉ. विजय गायकवाड, मुख्य अधिसेविका प्रणिता गायकवाड, विभागप्रमुख डॉ. संजय बनसोडे, डॉ. नरेंद्र पाटील, डॉ. प्रदीप लोखंडे प्रामुख्याने उपस्थित होते. डॉ. सोनाली मुपाडे, डॉ. हेमंत पाटील, डॉ. खुशाली राठोड, डॉ. श्रद्धा पाटील, डॉ. राजश्री येसगे, डॉ. निकिता सूर्यवंशी, डॉ. मोनिका येरमवार, डॉ. प्रणिता खरात, डॉ. पूजा बुजाडे, इन्चार्ज सिस्टर लता सावळे, सुवर्णा कांगाणे, भारती महाजन, संदीप सोनवणे, रेखा मोरे, कमल पवार, संपर्क सहायक विश्वजीत चौधरी उपस्थित होते.