Jalgaon News : शहरातील दोन बंद घर फोडून चोरट्यांनी ऐवज लंपास केला. एमआयडीसीच्या सदाशिवनगरात बंद घर फोडून साडेपंधरा हजार, तर, सदाशिवनगरातून ५८ हजारांचे दागिने व रोकड, असा ऐवज चोरट्यांनी लंपास केला. सदगुरूनगरातील तृप्ती कॉर्नर येथे जयश्री मयूर वाणी यांच्या आईच्या बंद घराचा कडीकोयंडा चोरट्याने तोडून घरातील लोखंडी कपाटातून १५ हजारांची रोकड आणि चांदीच्या वस्तू, दोन प्लॅस्टिकच्या सुटकेस चोरून नेल्या.

ही घटना मंगळवारी (ता. २३) सकाळी दहाला उघडकीस आली. याबाबत जयश्री वाणी यांनी दिलेल्या फिर्यादीवरून एमआयडीसी पोलिसांत गुन्हा दाखल झाला आहे. सहाय्यक फौजदार विजय पाटील तपास करीत आहेत. जुनाखेडी रोडवरील सदाशिवनगरात नितीन सुरवाडे (वय ३१) यांच्या बंद घराच्या काडीकोयंडा तोडून चोरट्यांनी घरात प्रवेश केला.

घरातील लोखंडी कपाटातून सोने- चांदीचे दागिने आणि ५ हजार रुपयांची रोकड, असा एकूण ५८ हजार २८५ रुपयांचा मुद्देमाल चोरून नेला. ही घटनाही मंगळवारी उघडकीस आली. याबाबत नितीन सुरवाडे यांनी दिलेल्या फिर्यादीवरून शनिपेठ पोलिसांत गुन्हा दाखल झाला आहे. सहाय्यक फौजदार रघुनाथ पवार तपास करीत आहेत. (latest marathi news)

पोलिस गस्त कागदावर

जळगाव शहरातील नियमित गस्त खंडित झाली असून, रात्री कधीतरी संबंधित पोलिस ठाण्याचा एकटा चालक गाडी घेऊन सायरन वाजवत फिरतो. बीट मार्शल असो, की डीबी पथकातील कर्मचारी मनाला पटेल तेव्हा फेरफटका मारून निघून जातात.

शहरातील विकसीत कॉलन्या आणि संमिश्र लोकवस्तीचा रहिवास असलेल्या झोपडपट्ट्यांत नियमित गस्तीसह रेकॉर्डवरील संशयितांची तपासणी करणे गरजेचे झाल्याचे बोलले जात आहे.