Jalgaon Crime News : चोपडा तालुक्यातील अडावद वन परीक्षेत्रात अनगड प्रकाराच्या लाकडापासून बनविलेले लाटणे विक्रीसाठी अवैधरीत्या नेत असताना वन विभागाने पकडले. या कारवाईत सुमारे पंधरा हजारांचा मुद्देमाल जप्त करण्यात आला आहे. याबाबत वन विभागाला मिळालेल्या गुप्त माहितीनुसार वन कर्मचारी गुरुवारी (ता. १४) घटनास्थळावर गेले असता तेथे मोटारसायकलवर दोन गोण्यांसह एक व्यक्ती दिसला. (Jalgaon Crime case filed by forest department against one in connection with illegal timber transportation)

त्याचा पाठलाग केला असता, तो मुद्देमाल व मोटारसायकल जागेवर सोडून जंगलाच्या दिशेने पळून गेला. गोण्या तपासल्या असता त्यात अनगड प्रकारातील लाकडापासून तयार केलेले ३१० लाटणे आढळून आले. याची किंमत वीस रुपये प्रमाणे ६ हजार २०० तसेच मोटारसायकल किंमत ९ हजार रुपये एकूण माल असा वाहनासह १५ हजार २०० रुपयांचा मुद्देमाल अडावद क्षेत्र येथे जमा करण्यात आला आहे.

या प्रकरणी वन कायद्यांतर्गत वनपाल कुंड्यापाणी यांनी गुन्हा दाखल केला आहे. ही कारवाई वनपरीक्षेत्र अधिकारी प्रशांत साबळे.

वनपाल कुंड्यापाणी भावना चव्हाण, वनपाल योगेश साळुंखे, वनरक्षक नवल चव्हाण, समीर तडवी, इंद्रसिंग पावरा यांनी केली. उपवनसंरक्षक यावल जमीर शेख, सहाय्यक वनसंरक्षक प्रथमेश हाडपे चोपडा यांच्या मार्गदर्शनाखाली कुंड्यापाणी वनपाल तपास करीत आहे.

जनतेने अवैध लाकूड वाहतूक व वनउपज शिकार जर होत असली तर १९२६ या टोल फ्री क्रमांकावर कळवावे व नजीकच्या वन परीक्षेत्राधिकारी कार्यालय येथेही कळवावे, असे आवाहन वन विभागातर्फे करण्यात आले आहे.