पारोळा : शहरातील एनईएस हायस्कूलच्या मुख्याध्यापकाला शिपायाकडून दहा हजार रुपयांची लाच घेताना धुळे लाचलुचपत प्रतिबंध विभागाने ताब्यात घेतले. ही घटना गुरुवारी (ता. २६) सायंकाळी घडली. (principal took bribe of 10 thousand in Parole)

येथील एनईएस हायस्कूलचा मुख्याध्यापक गौतम बालुप्रसाद मिसर (वय ५३, रा. जगमोहनदासनगर) याच्या भावाची काही दिवसांपूर्वी संस्थेचे अध्यक्ष म्हणून नियुक्ती झाली होती, त्या वेळी तो उपशिक्षक म्हणून कार्यरत होता. नोकरी टिकवायची असेल, तर दहा हजार रुपये आणून द्यावेत, अशी मागणी गौतम मिसर याने केली. शिपायाने धुळे लाचलुचपत प्रतिबंधक विभागाकडे ९ फेब्रुवारीला तक्रार दिली.

त्यावरून धुळे लाचलुचपत प्रतिबंधक विभागाने १० व १२ फेब्रुवारीला सापळा रचला. मात्र, मुख्याध्यापक मिसर याने लाचेची रक्कम इतर शिक्षकाकडे देण्यास सांगितल्याने कारवाई स्थगित करण्यात आली. मात्र, लाच मागितल्याप्रकरणी त्याच्यावर पारोळा पोलिस ठाण्यात भ्रष्टाचार प्रतिबंधक अधिनियमानुसार गुन्हा दाखल करण्यात आला आहे. (latest marathi news)

ही कारवाई लाचलुचपत प्रतिबंधक धुळे विभागाचे पोलिस उपअधीक्षक सचिन साळुंखे, पोलिस निरीक्षक रूपाली खांडवी, राजन कदम, मुकेश अहिरे, प्रवीण मोरे, संतोष पावरा, रामदास बारेला, प्रशांत बागूल, मकरंद पाटील, प्रवीण पाटील, सुधीर मोरे, जगदीश बडगुजर यांनी नाशिक लाचलुचपत प्रतिबंधक विभाग, पोलिस अधीक्षक शर्मिष्ठा घारगे-वालावलकर, अप्पर पोलिस अधीक्षक माधव रेड्डी व वाचक पोलिस निरीक्षक स्वप्नील राजपूत यांच्या मार्गदर्शनाखाली करण्यात आली.