Jalgaon Cyber Crime : शेअर ट्रेडिंगमध्ये गुंतवणूक करण्यासह अधिकचा नफा मिळवून देण्याचे आमिष दाखवून चाळीसगाव येथील निवृत्त वृद्धाची ५९ लाख रुपयांत ऑनलाइन फसवणूक केल्याची घटना उघडकीस आली आहे. याप्रकरणी गुरुवारी (ता. १८) जळगाव सायबर पोलिस ठाण्यात फसवणुकीचा गुन्हा दाखल झाला आहे. (Elder cheated of 59 lakhs by pretending to share trading)

चाळीसगाव शहरात ५९ वर्षीय व्यक्ती परिवारासह वास्तव्याला आहेत. ते महावितरण कंपनीतून अधिकारी म्हणून निवृत्त झाले आहे. १५ जानेवारीला त्यांना कॅथरिन मॅकवेल नावाच्या संस्थेच्या माध्यमातून शेअर ट्रेडिंगचे आमिष दाखवत वेगवेगळ्या ट्रेडिंग ग्रुपला जॉईन करून घेण्यात आले. नंतर त्यांना एक लिंक पाठवून गुंतवणूक केल्यास त्यांना अधिकचा नफा होणार असल्याचे आमिष दाखविले.

तीन महिन्यात भरली रक्कम

त्यानुसार निवृत्ताने १५ जानेवारी ते १९ मार्चदरम्यान वेळोवेळी ऑनलाईन पद्धतीने ५८ लाख ९५ हजार ३५१ रुपये भरले. रक्कम भरल्यानंतरही नफा मिळत नसल्याने व मुद्दलही गेल्याने आपली फसवणूक झाल्याची ज्येष्ठ नगरिकाची खात्री झाली. अखेर त्यांनी सायबर पोलिस ठाण्यात फिर्याद दिली. त्यावरून गुन्हा दाखल करण्यात आला आहे.