Jalgaon Fire Accident : शॉर्टसर्किटने रंगांच्या व प्लायवूडच्या दुकानाला आग लागून सुमारे साडेबारा लाखांचे नुकसान झाले. ही घटना शनिवारी (ता. १३) सकाळी धुळे रोडवरील बाजार समितीजवळ घडली. अग्निशमन दलाने वेळीच आग विझविल्याने आगीवर नियंत्रण मिळविण्यात आले, अन्यथा शेजारील दुकानांनाही आग लागली असती. शुभम पवार यांच्या श्रीदत्त हार्डवेअर दुकानाला आग लागल्याची माहिती सकाळी एक अज्ञात व्यक्तीने फोनवरून दिली. (Fire Accident Short circuit caused loss of twelve lakhs to shop )

पवार यांनी दुकान उघडून ताबडतोब अग्निशमन दलाला पाचारण केले. त्याठिकाणी विद्युत प्रवाह सुरू असल्यामुळे वायरमन आकाश वाडीले यांनी वीजपुरवठा बंद केला. आगीचे प्रमाण इतके भयानक होते, की दुकानातही प्रवेश करता येत नव्हता. अग्निशमन दलप्रमुख दिनेश बिऱ्हाडे, फारुख शेख, जफर पठाण, भिकन पठाण, आनंदा झिंबल, मच्छिंद्र चौधरी यांनी तातडीने आग विझविल्याने आजूबाजूच्या दुकानांना आग लागली नाही. (latest marathi news)

मात्र, पवार यांच्या दुकानातील सर्व ऑईलपेंट, रंग तयार करण्याचे मशीन, सर्व प्लायवूड जळून खाक झाले होते. शुभम पवार यांचे सुमारे साडेबारा लाखांचे नुकसान झाले आहे. पवार यांचा विमा नसल्याने त्यांना मोठा आर्थिक फटका बसला आहे. शॉर्टसर्किटमुळे रात्री दोनच्या सुमारास आग लागल्याचा अंदाज वर्तविला जात आहे. पोलिसांना माहिती देण्यात आली आहे.