सावदा (ता. रावेर) : मोठा वाघोदा येथील ‘गॅस्ट्रो’चे संक्रमण झालेल्या प्रभाग व परिसरातील पाहणी जिल्हा परिषदेचे मुख्य कार्यकारी अधिकारी अंकित, जिल्हा आरोग्याधिकारी डॉ. सचिन भायेकर, फैजपूरच्या प्रांताधिकारी देवयानी यादव, तहसीलदार बंडू कापसे, गटविकासाधिकारी दीपाली कोतवाल, तालुका आरोग्याधिकारी डॉ. अजय रिंढे यांच्यासह जिल्हाभरातील २५ अधिकाऱ्यांनी केली व समस्या जाणून घेतल्या. चिनावल प्राथमिक आरोग्य केंद्राला भेट देऊन रुग्णांची चौकशी केली. (Jalgaon motha Waghodya Inspection of premises with gastro patients)

वैद्यकीय अधिकाऱ्यांना आवश्यक ते उपचार करण्याचे सांगितले. दैनंदिन रुग्णसंख्या वाढत असल्याने मोठा वाघोद्यात आरोग्य विभागाने गॅस्ट्रोची साथ घोषित केली. २० मेस घेतलेले पाणी तपासणी नमुने दूषित असल्याचा अहवाल प्राप्त झाला आहे. २०१७ मध्येही त्याच प्रभागात डायरियाची साथ पसरली होती.

आताही उपरोक्त परिसरातील नागरिकांना गॅस्ट्रोचे रुग्ण आढळल्याने घटनेची पुनरावृत्ती झाली आहे. पाणीपुरवठा पाइपलाइन लिकेज झाल्यामुळे गॅस्ट्रोचे २१मेस २७, तर २२ मेस ११ रुग्ण आढळले होते. गुरुवारी (ता. २३) सकाळपासून दुपारी एकपर्यंत ८ नवीन रुग्ण चिनावल प्राथमिक आरोग्य केंद्रात दाखल झाले आहेत. (latest marathi news)

आणखी रुग्णसंख्येत वाढ होऊ शकते? आरोग्य विभागाने विविध भागातून पाणी तपासणी नमुने तपासले असता, ४ ते ५ पाणी नमुने दूषित असल्याचा अहवाल प्राप्त झाला. नंतर आरोग्य विभागाच्या अधिकाऱ्यांनी ग्रामपंचायतीला नोटीस बजावली आहे. गॅस्ट्रो परिसरात सध्या पाइपलाइनद्वारे पुरवठा बंद करून टँकरद्वारे शुद्ध पाणी पुरविण्याचे आदेश जिल्हा परिषदेचे मुख्य कार्यकारी अधिकारी डॉ. अंकित यांनी दिले.

या प्रकाराची समितीमार्फत सखोल चौकशी करून दोषींवर कारवाई करण्यात येणार असल्याचेही ते म्हणाले. परिसरातील नागरिकांनी नवीन पाइपलाइन, नवीन गटारी आदी समस्या जिल्हा परिषदेचे सीईओ डॉ. अंकित यांच्यासमोर मांडल्या. तत्पूर्वी त्यांनी गॅस्ट्रोची साथ आटोक्यात आणण्यासाठी प्रयत्न केले जातील. ज्यांना लक्षणे जाणवत असतील, त्यांनी तत्काळ आरोग्य केंद्रात दाखल व्हावे आणि आरोग्य यंत्रणेने आजार आटोक्यात आणण्यासाठी प्रयत्न करावेत, अशा सूचना दिल्या.