Jalgaon Crime News : अंजिठा चौकातून पुढील प्रवासाला निघण्याच्या तयारीत असलेले गुजरात राज्यातील दोन गुन्हेगारांना स्थानिक गुन्हे शाखेने अटक केली आहे. सुरत येथील एमआयएमचे पदाधिकारी खुर्शीद अली सय्यद यांच्याकडून १६ लाख रुपयांची सुपारी घेऊन आम्ही दोघांची गळा चिरून हत्या केल्याची कबुली दोघांनी दिली आहे. सूरज जिल्‍ह्यातील उमरपाडा येथे ८ जूनला बिलाल चांदी आणि अज्जू या दोघांची गळा चिरून हत्या झाली होती. (Gujarat killer arrested in custody of lcb after 2 murders)

संशयित अफजल अब्दुल शेख (वय ३८, रा. उमरपाडा मशिदीजवळ, सुरत), प्रज्ञेश दिलीप गामीत(वय २६, रा. तरकुवाँ डुंगरी फलिया, जि. वापी) दोन्ही फरारी झाले होते. २० दिवसांपासून सुरत पोलिस दोघांच्या मागावर होते. मात्र, ते मिळून येत नव्हते. गुजरात येथील दोन संशयित ऑटोनगरात आले असून, ते ट्रकमध्ये बसून फरारी होण्याच्या तयारीत आहे, अशी माहिती स्थानिक गुन्हे शाखेचे कर्मचारी अक्रम शेख यांना मिळाली.

त्यांनी निरीक्षक बबन अव्हाड यांनी माहिती दिली. त्यावरून उपनिरीक्षक गणेश वाघमारे, सहाय्यक फौजदार विजयसिंग पाटील, सुधाकर अंभोरे, लक्ष्मण पाटील, सचिन महाजन साध्या वेशात अंजिठा चौकात पोचले. संशयित ट्रकच्या शोधात असताना, पोलिसांनी त्यांच्यावर झडप घातली. अटक केल्यावर अफजल आणि प्रज्ञेश यांची गुन्हे शाखेच्या पथकाने चौकशी केली. त्यांनी खुनाची कबुली दिली.