अमळनेर : आर. के. नगरमध्ये इमारतीच्या तिसऱ्या मजल्यावर वेल्डिंगचे काम करत असताना, तोल जाऊन खाली पडल्याने मिलचाळ भागातील २४ वर्षीय शेख शाहीद शेख सादीक याचा मृत्यू झाला होता. शाहीदच्या पीडित कुटुंबीयांचे मदत व पुनर्वसन मंत्री अनिल पाटील यांनी सांत्वन करून ५१ हजारांची मदत रोख स्वरूपात दिली. (Jalgaon Help of 51 thousand to family of deceased Sheikh)

शाहीदचे कुटुंबीय त्याच्यासाठी मुलगी पाहण्यासाठी गेले होते. मात्र, दुर्दैवाने त्याचा मृत्यू झाला. या घटनेने शेख कुटुंबातील होतकरू आणि कमावता मुलगा जाऊन कुटुंबावर मोठा आघात झाल्याने मंत्री अनिल पाटील यांनी मुख्यमंत्री सहाय्यता निधीतून मदत मिळवून देण्याचे आश्वासन दिले असून, त्याबाबतचा प्रस्ताव तयार केला आहे.

काहीतरी आधार म्हणून मृत तरुणाच्या कौटुंबिक सदस्यांकडे मंत्री अनिल पाटील यांनी ५१ हजारांची मदत सुपूर्द केली. माजी नगरसेवक मनोज पाटील, राष्ट्रवादीचे शहराध्यक्ष मुक्तार खाटीक, इम्रान खाटीक, विनोद कदम, जितेंद्र हगविणे, विक्की पानसे, अलीम मुजावर, आबीद शेख व छत्रपती शिवाजी महाराज व्यायामशाळेचे सदस्य उपस्थित होते. या योगदानाबद्दल मिलचाळ भागातील छत्रपती शिवाजी महाराज व्यायामशाळेतर्फे मंत्री पाटील यांचे आभार मानण्यात आले.