चाळीसगाव : शहरातील बँक ऑफ महाराष्ट्रात वाहन कर्ज घेण्यासाठी खोटी कागदपत्रे सादर करून बँकेची एक कोटी ३० लाखांत फसवणूक केल्याप्रकरणी बँकेच्या दोन अधिकाऱ्यांसह एकाविरुद्ध येथील पोलिसांत गुन्हा दाखल झाला आहे.

हेही वाचा : मुदत ठेवीच्या मुद्दलातून टीडीएस कपात? इथे करा तक्रार....

सुशील भालचंद्र पाटील (रा. पंचवटी, नाशिक) यांनी वाहन घेण्यासाठी येथील महाराष्ट्र बॅंकेच्या शाखेत बनावट कागदपत्रे खरी भासवून सादर केली. बॅंकेच्या शाखेचे तत्कालीन शाखाधिकारी अजय सिंग व प्रोसेसिंग अधिकारी मंदार देशमुख यांनी या कागदपत्रांची खात्री न करता, सुशील पाटील यांना वाहन कर्जासाठी एक कोटी ३० लाख रुपये मंजूर केले.

कर्जदार पाटील यांनी बॅंकेला सादर केलेली कागदपत्रे बनावट असल्याचे लक्षात आल्यानंतर बॅंकेची फसवणूक झाली, म्हणून वरील तिघांविरुद्ध बॅंकेतर्फे निशांत इलमकर यांनी दिलेल्या फिर्यादीवरून शहर पोलिस ठाण्यात गुन्हा दाखल झाला. सहाय्यक पोलिस निरीक्षक सागर ढिकले तपास करीत आहेत.