Jalgaon Bribe Crime : भडगाव येथील हवालदाराने वाळू व्यावसायिकाला २ लाख ६० हजारांची लाच मागितली. तडजोडी अंती ५० हजारांची लाच स्वीकारताना जळगाव लाचलुचपत प्रतिबंधक विभागाने त्याच्या मुसक्या आवळल्या. शुक्रवारी (ता. २६) सकाळी ही कारवाई करण्यात आली. वाळूमाफियांकडून पोलिसांना अडकविण्याची कारवाई नेहमीच होते. तरीही पोलिस वाळूमाफियांना अभय देतात. (Police arrested while accepting bribe from sand businessman )

भडगाव येथील २८ वर्षीय तक्रारदाराचा वाळू वाहतुकीचा व्यवसाय आहे. त्यांच्यावर यापूर्वी भडगाव ठाण्यात अवैध वाळू वाहतुकीसंदर्भात दोन गुन्हे दाखल आहेत. सुरळीत वाळू वाहतूक करण्यासाठी, तसेच त्यांच्यावर कोणतीही कारवाई न करण्यासाठी भडगाव ठाण्यातील हवालदार किरण रवींद्र पाटील (वय ४१) यांनी २ लाख ७० हजार रुपयांची लाच मागितली होती. याबाबत तक्रारदाराने जळगाव लाचलुचपत प्रतिबंधक विभागाकडे तक्रार दिली होती.

गुरुवारी (ता. २५) पंचासमोर लाच मागणीची पडताळणी केली असता, हवालदार किरण पाटील यांनी तक्रारदाराकडे २ लाख ६० हजारांची मागणी करून त्यातील पहिला हप्ता ५० हजार रुपये देण्याचे ठरले. शुक्रवारी (ता. २६) किरण पाटील यास लाच घेताना मुद्देमालासह पकडण्यात आले. याबाबत भडगाव पोलिस ठाण्यात गुन्हा दाखल झाला आहे. लाचलुचपत प्रतिबंधक विभागाचे पोलिस उपअधीक्षक सुहास देशमुख यांच्या मार्गदर्शनाखाली पोलिस निरीक्षक नेत्रा जाधव, उपनिरीक्षक दिनेशसिंग पाटील, राकेश दुसाने, अमोल सूर्यवंशी यांनी ही कारवाई केली.