Jalgaon Eknath Khadse : माजी मंत्री तथा राष्ट्रवादी काँग्रेस शरद पवार गटाचे आमदार एकनाथ खडसे यांच्यासह त्यांच्या पत्नी मंदाकिनी व जावई गिरीश चौधरी यांना पुण्यातील भोसरी जमीन गैरव्यवहार प्रकरणी दाखल गुन्ह्यात नियमित जामीन मंजूर झाला आहे. पुणे न्यायालयाने हा जामीन मंजूर केल्याने खडसे कुटुंबीयांना मोठा दिलासा मिळाला. (Jalgaon Regular bail to wife, son-in-law with Eknath Khadse)

पुण्यातील भोसरी येथील जमीन खरेदी व्यवहारात तत्कालीन महसूलमंत्रिपद असताना खडसेंनी पदाचा दुरुपयोग करून कुटुंबीयांना फायदा होईल, असे कृत्य केल्याचा त्यांच्यावर आरोप होता. याच कारणास्तव खडसेंना फडणवीस मंत्रिमंडळातून मंत्रिपदाचा राजीनामा द्यावा लागला होता.

या जमिनीची बाजारभावानुसार किंमत जास्त असताना ती कवडीमोल किमतीत खरेदी केल्याचा ठपका खडसेंच्या पत्नी मंदाताई व जावई गिरीश चौधरी यांच्यावर होता. (latest marathi news)

चौधरी यांना या प्रकरणी ‘इडी’ने अटक केली होती. मात्र, गेल्या वर्षीच त्यांना पीएमएलए कोर्टाने जामीन मंजूर केला होता. या प्रकरणी पुणे लाचलुचपत प्रतिबंधक विभागातही गुन्हा दाखल होता.

त्यासंबंधी न्या. पी. पी. जाधव यांच्या न्यायालयात खटला सुरू होता. त्यावर आज सुनावणी होऊन खडसे दांपत्यासह गिरीश चौधरींना नियमित जामीन मंजूर करण्यात आला. ॲड. अबीद मुलानी यांनी खडसे कुटुंबीयांतर्फे कामकाज पाहिले.