पाचोरा : खडकदेवळा बुद्रूक (ता.पाचोरा) येथील सरपंच अनिल विश्राम पाटील यांनी तक्रारदाराकडून घरकुल योजनेच्या लाभासाठी दहा हजार रुपयांची लाचेची मागणी केली होती. ती स्वीकारताना लाचलुचपत प्रतिबंधक विभागाच्या पथकाने त्यांना अटक केली. ही कारवाई आज करण्यात आली. (Sarpanch of Khadakdevla arrested while accepting bribe)

तक्रारदार खडकदेवळा बुद्रूक गावातील रहिवासी आहेत. त्यांचे नावे प्रधानमंत्री आवास योजनेतील घरकूल मंजूर झाले. परंतु, ते राहत असलेली जागा त्यांचे नावे नसल्याने गाव नमुना आठ ‘अ’मध्ये ग्रामसेवकाकडून नाव लावून घेण्यासाठी सरपंच अनिल पाटील यांनी दहा हजार रुपयांची लाच मागितली.

ती लाच स्वीकारताना जळगाव येथील लाचलुचपत प्रतिबंधक विभागाच्या पथकाने त्यांना रंगेहाथ पकडले. ही कारवाई शुक्रवारी (ता.२७) सायंकाळी करण्यात आली. याबाबत पाचोरा पोलिस ठाण्यात सरपंच अनिल पाटीलविरोधात गुन्हा नोंदविण्यात आला आहे.