बोदवड : नगरपंचायतीचा बोगस कारभार पुन्हा चव्हाट्यावर आला असून, शहरात एका प्रवर्गाची निवडणूक असल्याने आचारसंहिता सुरू आहे. मागील ११ जुलैचा ‘अजेंडा’ १६ ला नगरसेवकांना देऊन त्यांच्याकडून सह्या घेतल्याचा प्रकार शहरात घडल्याने नगराध्यक्षांसह पालिकेच्या अधिकाऱ्यांवर कारवाई करण्याची मागणी राष्ट्रवादीच्या सर्व नगरसेवकांनी जिल्हाधिकाऱ्यांकडे केली. (Signatures taken on Agenda by misleading corporators Complaint of Bodwad complaint of NCP)

बोदवड नगरपंचायतीत अनागोंदी कारभार सुरू असून, नगराध्यक्षांच्या सहीचा मागील तारखेचा अजेंडा प्रकाशित करून ‘अजेंडा’ नगरसेवकांकडे सह्यांसाठी पाठविला होता. या तारखांचा घोळ बघितल्यानंतर राष्ट्रवादीच्या नगरसेवकांच्या ही सभा बोगस होणार असल्याची कल्पना आल्यामुळे त्या नगरसेवकांनी आक्षेप घेतला.

चर्चा न करता मागील तारखेत सभा दाखविणे, हा अपराध असल्याने त्याबाबत नगराध्यक्ष, मुख्याधिकारी व कार्यालयीन कर्मचाऱ्यांना राष्ट्रवादीच्या नगरसेवकांनी वारंवार सांगितले आहे. सद्यस्थितीत बोदवड नगरपंचायतीचे प्रभाग चारची पोटनिवडणूक घोषित झाली असून, आचारसंहितेत अशाप्रकारचे कृत्य सुरू आहे. (latest marathi news)

यापूर्वीही जिल्हाधिकारी कार्यालयाकडे सभेच्या तक्रारी केल्या आहेत. जिल्हाधिकाऱ्यांनी त्या सभा रद्द केल्या आहेत. संबंधित पदाधिकारी व कर्मचारी नगरपंचायतीत अनागोंदी कारभार करीत असून, याबाबत गांभीर्याने दखल घेऊन सखोल चौकशी करून संबंधित अधिकाऱ्यांवर कारवाई करण्याची मागणी राष्ट्रवादीच्या नगरसेवकांनी जिल्हाधिकाऱ्यांकडे केली.

संबंधितांवर कारवाई न झाल्यास जिल्हाधिकारी कार्यालयासमोर बेमुत उपोषण करणार असल्याचा इशारा निवेदनात दिला आहे. प्रभाग चारची पोटनिवडणुकीची आचारसंहिता लागू असताना, नगरपंचायत कार्यालयातील मस्टर बाहेर जाणे, मागील तारखेच्या सभेचे अजेंडे नगरसेवकांकडे पाठविणे, हे आदर्श आचारसंहितेचे उल्लंघन असल्याने जिल्हाधिकारी मुख्याधिकाऱ्यांवर काय कारवाई करतील, याकडे बोदवडवासीयांचे लक्ष लागून आहे.