Jalgaon News : केंद्रीय वित्त व नियोजनमंत्री निर्मला सीतारामन यांनी अर्थसंकल्प सादर करताना सहा टक्के सीमाशुल्क (कस्टम ड्यूटी) कमी केल्यामुळे सोन्याच्या दरात लागलीच घसरण झाल्याचे दिसून आले. देशात प्रसिद्ध असलेल्या सुवर्णनगरी जळगावातील सराफ बाजारात सोन्याचे भाव प्रति १० ग्रॅमसाठी २ हजार ५०० रुपयांनी कमी झाले असून, चांदीच्या भावात प्रतिकिला तीन हजारांची घसरण झाली आहे. (Two and a half thousand in price of gold three thousand in silver)

यामुळे गुंतवणुकीच्या दृष्टीने सोने खरेदीदारांना संधी मिळाली आहे. केंद्रीय अर्थमंत्री निर्मला सीतारामन यांनी मंगळवारी (ता. २३) अर्थसंकल्प जाहीर केला. अर्थसंकल्पात सोने खरेदीसाठी दिलासा मिळाला आहे. सोने-चांदीवर आधी १० टक्के सीमाशुल्क आकारले जात होते, तर प्लॅटिनमवर यापूर्वी १५ टक्के आयात शुल्क (इम्पोर्ट ड्यूटी) होते.

अर्थसंकल्प जाहीर करताना सोन्या-चांदीवरील सीमाशुल्क ६ टक्क्याने कमी करण्याची घोषणा केली. ही घोषणा झाल्यानंतर लागलीच सोन्याच्या दरात घसरण झाल्याचे पाहावयास मिळाले. यामुळे जळगावच्या बाजारात सोन्याचे भाव २५०० रुपयांनी कमी झाले आहेत. (latest marathi news)

जळगावच्या सराफ बाजारात २२ जुलैस सोन्याचे भाव प्रति १० ग्रॅमला ७३ हजार २०० रुपये होते. मंळगवारी हेच भाव ७० हजार ५०० रुपये खाली आले आहेत. चांदीचा २२ जुलैस प्रतिकिलो भाव ९० हजार होता. तो मंगळवारी तीन हजारांनी कमी होऊन ८७ हजारांपर्यंत आला आहे.

"केंद्रीय अर्थसंकल्पात अर्थमंत्र्यांनी सोने-चांदीवरील सीमाशुल्क कमी केल्याचे जाहीर केले. त्यामुळेच बाजारपेठेत सोन्या-चांदीच्या भावात घसरण दिसून येत आहे. सरकारचा हा चांगला निर्णय आहे. त्यामुळे गुंतवणूकदारांना दिलासा मिळू शकेल." - सुशील बाफना, संचालक, आर. सी. बाफना ज्वेलर्स, जळगाव