पाचोरा : येथील शहर व शहरालगतच्या वसाहतीतील दुर्दशा झालेल्या रस्त्यांची दुरूस्ती तसेच नागरी सुविधांच्या पूर्ततेसाठी शिवसेना उद्धव ठाकरे पक्षाच्या वतीने एल्गार पुकारण्यात आला असून, वैशाली सूर्यवंशी यांच्या नेतृत्वाखाली पदाधिकारी व शिवसैनिकांनी संतप्त भावनेने जाब विचारत मुख्याधिकारी मंगेश देवरे यांना निवेदन दिले. रस्त्यांची दुरुस्ती व नागरी सुविधांची पूर्तता त्वरित न केल्यास शिवसेना स्टाईल आंदोलन करण्याचा इशारा दिला आहे. (Jalgaon UBT Elgar road problem in Pachora)

निवेदनाचा आशय असा की, शहरातील व वसाहतीतील रस्त्यांवर प्रचंड खड्डे पडले आहेत. खड्डे चुकविण्याच्या नादात अपघात व जखमी होणाऱ्यांचे प्रमाणही वाढले आहे. रस्ते सुरक्षितता जीवन मरणाचा प्रश्न व आपला प्रवास सुखाचा होवो, अशी घोषवाक्य लिहिलेल्या ठिकाणी रस्त्यावर खड्डे पडल्याने पालिकेचे हसू होत आहे.

अपघातामुळे अनेकांना अपंगत्व येत असून, जीवित हानीची भीती वाढली आहे. लोकप्रतिनिधी मात्र डोळ्यावर पट्टी बांधून फिरत आहेत. ग्रामीण भागातील रस्त्यांची अवस्था दयनीय झाली आहे. वसाहतीत रहिवाशांना घरापर्यंत जाणे कठीण झाले असून, मुले, महिला, वृद्धांना प्रचंड मनस्ताप होत आहे.

अनेक ठिकाणी डबकी साचली असून, डास, चिलटे, दुर्गंधी यांचा उपद्रव वाढून आरोग्याची भीतीही निर्माण झाली आहे. कोट्यवधी रुपये खर्च करून रस्त्यांची कामे केल्याचा व सत्ताधारी आव आणतात. परंतु रस्त्यांची कालमर्यादा संपण्याअगोदरच त्यांची दुर्दशा झाली आहे. (latest marathi news)

विकासाच्या गप्पा मारणाऱ्यांनी या रस्त्यांकडे पाहावे व आत्मचिंतन करावे. आता उबाठा हे खपवून घेणार नाही, असा इशारा देऊन या रस्त्यांची त्वरित करून दुरुस्ती करण्यात यावी. रस्त्याची कामे करताना तेथे त्याची कालमर्यादा व ठेकेदाराचे नाव यासंबंधीचा माहिती फलक लावावा. नागरी सुविधांबाबत प्राधान्याने कार्यवाही करावी; अन्यथा पालिका प्रशासनाविरुद्ध शिवसेना स्टाईल आंदोलन करण्यात येईल, असा इशारा देण्यात आला आहे.

निवेदनासोबत शहरातील दुर्दशा झालेल्या ५० रस्त्यांचे व घाणीचे फोटो पुरविण्यात आले आहेत. निवेदनावर वैशाली सूर्यवंशी, अरुण पाटील, उद्धव मराठे, ॲड. अभय पाटील, शरद पाटील, संदीप जैन, अनिल सावंत, ॲड. दीपक पाटील, शशी पाटील आदी पदाधिकाऱ्यांच्या सह्या आहेत.