अमळनेर : रब्बी हंगामाच्या ज्वारी खरेदीला शासनाने अखेर परवानगी दिली आहे. जिल्हा मार्केटिंग फेडरेशनने नोंदणीचे आदेश दिले आहेत. अनेक दिवसांपासून ज्वारीची शासकीय खरेदी सुरू करण्याची मागणी शेतकरी करीत होते. अखेर शासनाने आठ रोजी ज्वारी खरेदीचे आदेश काढले आहेत. (Jowar Finally government permission to purchase Jowar)

शासनाने ज्वारीसाठी तीन हजार १८० रुपये प्रति क्विंटल भाव जाहीर केला आहे. बाजारात ज्वारी दोन हजार ते तेवीसशे रुपयाने खरेदी केली जात आहे. शेतकऱ्याला ८०० ते ११०० रुपये प्रति क्विंटल फायदा होणार असल्याने शेतकऱ्यांना आनंद झाला आहे.

"ज्वारी खरेदीसाठी ३१ मेपर्यंत शनिवारी सकाळी दहापासून नोंदणी सुरू राहील. आधार कार्ड, बँकेचा खाते क्रमांक, पीकपेरा लावलेला सात बारा उतारा यासह शेतकऱ्यांचा फोटो घ्यावा लागणार असल्याने शेतकरी स्वतः हजर राहणे आवश्यक आहे."

- संजय पाटील, व्यवस्थापक, शेतकरी सहकारी संघ, अमळनेर