Jalgaon KBCNMU News : सायबर सुरक्षितता जनजागृतीसंदर्भात पुण्याच्या क्वीक हिल फाउंडेशनतर्फे कवयित्री बहिणाबाई चौधरी उत्तर महाराष्ट्र विद्यापीठास तीन पुरस्कार प्राप्त झाले. (kbcnmu received 3 awards from pune Quick Heal Foundation jalgaon news)

विद्यापीठाच्या संगणकशास्त्र प्रशाळेतर्फे सायबर सुरक्षेसंदर्भात जनजागृती करण्यात आली. क्वीक हिल फाउंडेशनने या कार्याची दखल घेत प्रशाळेतील धनराज बोंडे (एमएस्सी कॉम्प्युटर सायन्स) व मानसी बोरोले (एमसीए) या विद्यार्थ्यांना सायबर एज्युकेशन चॅम्पियन ऑफ द इयर ॲज आऊटस्टँडींग परफॉर्मन्स ॲवार्ड,

प्रशाळेतील शिक्षक राजू आमले यांना सायबर सुरक्षा चॅम्पियन ऑफ द इयर ॲज एक्स्ट्रा माईल रिकग्नेशन ॲवार्ड आणि संगणकशास्त्र प्रशाळा व विद्यापीठास ‘सायबर एज्युकेशन चॅम्पियन ऑफ द इयर ॲज स्पेशल ॲप्रीसिएशन फॉर मीडिया ऑऊटरिच ॲवार्ड’ देण्यात आले. हे पुरस्कार छत्रपती संभाजीनगर येथे देण्यात आले.

हेही वाचा : सामान्यांचा पैसा सुरक्षित ठेवण्यासाठीच Virtual Currency करकक्षेत

या कार्याची दखल

विद्यापीठाच्या संगणकशास्त्र प्रशाळा आणि क्वीक हिल फाऊंडेशनच्या संयुक्त करारांतर्गत सायबर शिक्षणासाठी सायबर सुरक्षा, कमवा व शिका योजनेत ३८ विद्यार्थ्यांनी सहभाग नोंदविला. ३८ स्वयंसेवकांनी विद्यापीठांतर्गत असलेल्या जळगाव, धुळे व नंदुरबार जिल्ह्यांतील ग्रामीण व शहरी भागातील जवळपास २५० शाळा व महाविद्यालयांमध्ये जाऊन सायबर सुरक्षेवर प्रबोधन केले.

या स्वयंसेवकांनी जवळपास एक लाख ४० हजार विद्यार्थी व विद्यार्थिनींचे सायबर सुरक्षेवर प्रबोधन केले. त्यात विशेष म्हणजे आदिवासी बहुल असलेल्या नंदुरबार जिल्ह्यातील १० आदिवासी आश्रमशाळा, तसेच यावल तालुक्यातील २० उर्दू शाळा व महाविद्यालयांना भेटी दिल्या आहेत. या कार्याची दखल घेत हे पुरस्कार देण्यात आले आहेत, अशी माहिती प्रशाळेचे संचालक प्रा. सतीश कोल्हे यांनी दिली.