जळगावः महात्मा फुले मागासवर्गीय विकास महामंडळाच्या (Mahatma Phule Backward Classes Development Corporation) योजनेत साडेसहा कोटी रुपयांच्या अपहार (Scam) प्रकरणाचा गुन्हा जळगाव आर्थिक गुन्हे शाखेकडे (Jalgaon Economic Crimes Branch) वर्ग झाला आहे. यात माजी जिल्हा व्यवस्थापक व लेखापाल यांनी दलालाला हाताशी धरून भुसावळातील बोगस लाभार्थी दाखविले आहेत. जे लाभार्थी अस्तित्वातच नाहीत तर काहींचे काल्पनिक नाव व पत्ते वापरले आहेत. या संदर्भात जळगाव गुन्हे शाखेच्या पथकाने भुसावळातून संदीप प्रभाकर साबळे यास अटक (Arrest) केली असून, त्याच्या गणेशनगरातील घराची शुक्रवारी झडती घेतली. यामुळे शहरात एकच खळबळ उडाली आहे. (scam case action economic crimes branch bhusawal)

महात्मा फुले मागासवर्ग विकास महामंडळाकडून अर्थसहाय्य घेताना बोगस लाभार्थी दाखवून महामंडळ व बँकेच्या अधिकाऱ्यांनी साडेसहा कोटी रुपयांचा अपहार केला असून, त्यात ७०२ बोगस लाभार्थी दाखविण्यात आले आहेत. यात महामंडळ व बँकांचे अधिकारी, कर्मचारी यांच्यासह एजंट आदींचा समावेश आहे. २०१६ ते २०१८ या कालावधीत हा अपहार झाला असून, या प्रकरणी महात्मा फुले मागासवर्ग विकास महामंडळाच्या जिल्हा व्यवस्थापक वैशाली जाधव यांनी २ ऑगस्ट २०१९ रामानंदनगर पोलिस ठाण्यात तक्रार दिल्याने गुन्हा दाखल झाला होता. यात बँकेच्या अधिकारी, कर्मचाऱ्यांनी दलालांना हाताशी धरून एकाचा फोटो दुसऱ्याच्या आधारकार्डवर, पत्ता तिसऱ्याचाच अशा प्रकारची तब्बल ७०२ बोगस प्रकरणे तयार करून बीजभांडवल योजनेंतर्गत साडेसहा कोटी रुपयांचा अपहार केला.

आतापर्यंत यांना झाली अटक...
जळगाव आर्थिक गुन्हे शाखेकडे वर्ग करण्यात आला. या गुन्ह्यात याआधी महामंडळाचा व्यवस्थापक खंडू विठोबा लोहकरे (रा. नाशिक), अकाउंटंट सागर वसंत अडकमोल (रा. रविराज कॉलनी), सुनंदा बाबूराव तायडे (रा. वानखेडे हाउसिंग सोसायटी), प्रकाश लक्ष्मीकांत कुळकर्णी (रा. राधाकृष्णनगर), अमरिश अनिल मोकाशी (रा. सद्‍गुरूनगर) व संजीव वसंत सोनवणे (रा. भुसावळ) यांना अटक झाली आहे, तर मुकेश देवराम बारमासे (रा. नागपूर) यांना अटकपूर्व जामीन मंजूर झाला आहे.

भुसावळातील संशयिताला अटक...
जळगाव आर्थिक गुन्हे शाखेच्या पथकाने गुरुवारी (ता. २४) भुसावळ येथून संदीप साबळे याला अटक केली व त्यास न्यायालयात हजर केले असता न्यायालयाने २७ जूनपर्यंत पोलिस कोठडी सुनावली. दरम्यान, शुक्रवारी, जळगाव आर्थिक गुन्हे शाखेचे निरीक्षक बळिराम हिरे, हवालदार चंद्रकांत शिंदे, राजेंद्र पाटील, अधिकार पाटील व भुसावळ शहर पोलिस ठाण्याच्या कर्मचाऱ्यांनी गणेशनगरातील संदीप साबळे याच्या घराची झडती घेतली, मात्र त्यात काहीही आढळले नसल्याचे हिरे यांनी सांगितले.