जळगाव : कोरोना (Coronavirus) काळात पालक गमावलेल्या गरीब तरुणींच्या विवाहाची जबाबदारी भरारी फाउंडेशन व के. के. कॅन्सने स्वीकारली. याअंतर्गत शिरसोलीतील एका तरुणीचा विवाह १६ जूनला होत असून, तिचा संसार फुलविण्यासाठी या संस्थांचे दातृत्व सज्ज झाले आहे. (jalgaon-bharari-foundation-Orphan-girl-marriage)

जळगावातील भरारी फाउंडेशन व के.के. कॅन्सतर्फे जिल्ह्यातील कोरोना काळात अनाथ झालेल्या दहा मुलींच्या लग्नाची (Orphan girl marriage) जबाबदारी स्वीकारण्यात आली आहे. शिरसोली येथील दशरथ बुधा भिल यांचे कोरोनाने एप्रिलमध्ये निधन झाले. त्यांची कन्या शुभांगीचा विवाह १६ जूनला पाचोरा येथे होणार आहे.

अशी केली मदत

त्यानिमित्त भरारी फाउंडेशन व के.के. कॅन्सच्या सहकार्याने नववधूस मंगळवारी सोन्याचे मंगळसूत्र, दागिने, साड्या, संसाराला आवश्यक वस्तू, भांडे आणि रोख मदत व सर्व वस्तू मिळून ३० हजारांपर्यंत मदत जिल्हाधिकारी अभिजित राऊत यांच्या हस्ते देण्यात आली.

पोरके झालेल्‍यांपर्यंत पोहचा

पद्मावती मंगल कार्यालयात पार पडलेल्या कार्यक्रमाला के.के. कॅन्सचे संचालक रजनीकांत कोठारी, भरारीचे अध्यक्ष दीपक परदेशी, डॉ. स्वप्नील पाटील, अमित भाटिया, विनोद ढगे, अमर कुकरेजा, रवींद्र लढ्ढा, बाळासाहेब सूर्यवंशी, रितेश लिमडा, नीलेश जैन, दीपक विधाते, सचिन महाजन, नीलेश झोपे विक्रांत चौधरी आदी उपस्थित होते. कोरोना काळात अनेकांचे छत्र हरविले असून, पोरके झालेल्या या घटकापर्यंत पोचणे आवश्यक आहे. भरारी व के.के. कॅन्सकडून हे कार्य चोखपणे आणि नि:स्वार्थ भावनेने पार पाडले जात असल्याचे गौरवोद्‌गार जिल्हाधिकारी अभिजित राऊत यांनी यानिमित्त काढले.