जळगाव : जिल्ह्यात कोरोनाचा (Corona) संसर्ग नियंत्रणात असताना बोदवड तालुक्यात गेल्या तीन-चार दिवसांत तब्बल १५ नव्या रुग्णांची नोंद (New Patient) झाल्याने चिंता वाढली आहे. मंगळवारी (ता. १७)ही बोदवड तालुक्यातील ६ रुग्णांसह जिल्ह्यात ९ नवे बाधित आढळून आले. तर अवघे ३ रुग्ण बरे झाले.

जळगाव जिल्ह्यात दोन महिन्यांपासून कोरोनाचा उतरता आलेख कायम आहे. संपूर्ण जुलै महिन्यात जिल्ह्यात रोज आढळून येणाऱ्या नव्या रुग्णांची संख्या दहा- पंधराच्या आतच राहिलेली आहे. असे असताना गेल्या तीन-चार दिवसांपासून बोदवड तालुक्यात काही प्रमाणात संसर्ग वाढू लागला आहे.

सर्वांत प्रथम कोरोनामुक्त झालेल्या बोदवड तालुक्यात या तीन-चार दिवसांतच १५ रुग्ण समोर आलेत. मंगळवारी प्राप्त झालेल्या १ हजार ५९७ अहवालांमध्ये ९ नवे रुग्ण समोर आले असून, त्यापैकी ६ रुग्ण बोदवड तालुक्यातील आहेत. तर जळगाव ग्रामीण १ व भुसावळ २ असे रुग्ण सापडले. तुलनेत अवघे ३ रुग्णच बरे झालेत. जिल्ह्यातील एकूण रुग्णांची संख्या आता १ लाख ४२ हजार ६७० झाली असून बरे होणाऱ्यांचा आकडा १ लाख ४० हजार ६०वर पोचला आहे. सक्रिय रुग्णसंख्या आता वाढून ३५वर पोचली आहे.