Jalgaon News : पावसामुळे शहरातील अनेक भागांत रस्त्यांवर पाणी साचले आहे. या पाण्याचा ताबडतोब निचरा करण्याचे काम मंगळवार (ता.२५)पासून सुरू होणार आहे.

याबाबत महापौर जयश्री महाजन व उपमहापौर कुलभूषण पाटील यांनी बैठक घेऊन आदेश दिले. (Mayor Deputy Mayor order to drain water accumulated on road jalgaon news)

शहरातील अनेक भागांत पावसामुळे पाणी साचले आहे. त्यामुळे नागरिकांना चालणेही कठीण होत आहे. पाण्याचा निचरा करण्याबाबत सोमवारी (ता. २४) महापौर महाजन व उपमहापौर पाटील यांनी अधिकाऱ्यांची बैठक घेतली.

त्यांनी शहरातील रस्त्यांवर पाणी साचलेल्या ठिकाणाची माहिती घेतली. त्या ठिकाणी पाण्याचा निचरा करण्याबाबत कशा उपाययोजना करण्यात येतील, याचीही चर्चा केली.

हेही वाचा : Credit Card फसवणूक....काय घ्याल काळजी?

पाईप टाकून, गटारी काढून निचरा

ज्या भागात पाणी साचले आहे, त्या ठिकाणी पाईप टाकून किंवा गटारी तयार करून ताबडतोब पाण्याचा निचरा करण्यात येणार आहे. बिबानगर भागात नाल्याचे पाणी साचत असल्याने तेथे मोठे पाईप टाकून तातडीने पाण्याचा निचरा करण्यात येणार आहे. याशिवाय शिंदेनगर भागातही उपाययोजना करण्यात येणार आहे.

गटारीद्वारे निचरा

शहरातील अनेक भागांतील रस्त्यांवर मोठ्या प्रामाणात पाणी साचले आहे. गटारी नसल्याने त्या ठिकाणी पाण्याचा निचरा होत नाही. त्या ठिकाणी छोटे पाइप टाकून किंवा गटारी तयार करून पाण्याचा निचरा करण्याचे आदेश देण्यात आले. महापालिकेचे शहर अभियंता चंद्रकांत सोनगिरे, आरोग्याधिकारी उदय पाटील व इतर विभागाचे अधिकारी उपस्थित होते.