Jalgaon Monsoon : शहरासह जिल्ह्यात आज दिवसभर पावसाने विश्रांती घेतली. यामुळे शेतात मशागत, निंदणीसाठी शेतकऱ्यांसह शेतमजूर सरसावले होते. दोन ते तीन दिवसांपासून शहरासह जिल्ह्यात सतत पाऊस सुरू आहे.

दरम्यान, सायंकाळी पावणेसहाच्या सुमारास अचानक धुवाधार पावसाला सुरवात झाली. तब्बल साडेसहापर्यंत पाऊस सुरू होता. त्याने शहरातील अनेक रस्त्यांवर पाणी साचले होते. विजांच्या कडकडाटासह पावसाची रिपरिप रात्री उशिरापर्यंत सुरू होती. (monsoon uodate tourism people Jalgaon)

हेही वाचा : Credit Card फसवणूक....काय घ्याल काळजी?

रविवारी (ता. २३) सकाळपासूनच पावसाने विश्रांती घेतली. सूर्यप्रकाशही पडल्याने शेतात साचलेले पाणी वाहून जाण्यास उसंत मिळाली. रविवारी शेतकरी शेतात साचलेले पाणी काढणे, शेतातील तण काढणे, निंदणी करताना दिसत होते.

सततच्या पावसामुळे घरात बसून कंटाळलेल्या नागरिकांना पावसाच्या उघडिपीने मोकळीक मिळाली. काहींनी कुटुंबीयांसह, तर काहींनी मित्रांसोबत वाघूर (ता. जळगाव), हतनूर (ता. भुसावळ) धरणांवर नैसर्गिक सौंदर्य पाहण्यासाठी गर्दी केली होती.

काहींनी धरणावर जाऊन भोजनाचा आस्वाद घेतला. काही तरुणांनी पार्टी केली. अनेकांनी शहरातील मेहरुण तलावात झालेला साठा व सौंदर्य पाहण्यासाठी गर्दी केली होती.