जळगाव : फुले मार्केटमधील अतिक्रमण हटविण्याची गम्मतच भारी आहे, अतिक्रमण हटविण्यासाठी महापालिकेने पोलीसांना बंदोबस्त मागितला, तर दुसरीकडे पोलिसांनीच अतिक्रमण हटविण्याची कारवाई करावी, असे पत्र महापालिकेस दिले आहे. त्यामुळे सद्या तरी या पत्रांचा अजब खेळ सुरू आहे, दुसरीकडे फुले मार्केटमध्ये कारवाई कधी होणार, याबाबत प्रश्‍नचिन्ह निर्माण झाले आहे.

शहरातील मध्यवर्ती भागात असलेल्या फुलेमार्केट व सेंट्रल फुले मार्केटमधील अतिक्रमण तत्कालीन उपायुक्त श्री. वाहुळे यांनी हटविले होते. त्या पुढे असलेले फळ बाजाराचे अतिक्रमणही काढले होते. मात्र आता हे अतिक्रमण पुन्हा झाले आहे. फुले मार्केटची परिस्थिती तर अत्यंत वाईट आहे, या ठिकाणी दिवसेंदिवस अतिक्रमण वाढत असून ग्राहकांना ये-जा करण्यासाठीही जागा शिल्लक नाही. या ठिकाणचे अतिक्रमण हटविण्याची मागणी त्या ठिकाणच्या दुकानदारांसह अनेक नागरिकांनी केली आहे. पण त्यावर कारवाई झाली नाही.

पत्रांचा असाही खेळ

फुले मार्केटचे अतिक्रमण काढण्यासाठी महापालिकेने पोलिस बंदोबस्त मागितला आहे. यासाठी शहर पोलिस स्टेशनला दोन वेळा पत्रही देण्यात आले आहे. मात्र बंदोबस्त देण्याबाबत पोलिसांनी महापालिकेला काही कळविले नाही. या उलट पोलिसांनीच महापालिकेला एक पत्र पाठविले असून फुले मार्केटमधील अतिक्रमणाबाबत नागरिकांच्या तक्रारी येत आहेत. त्यामुळे फुले मार्केटमधील अतिक्रमण हटविण्याची कारवाई करण्यात यावी, असे पत्र पाठविले आहे. पोलिस विभागाचे हे पत्र पाहताच महापालिकेचे अधिकारीही चक्रावले त्यांनी पुन्हा पोलिस विभागाला पत्र पाठवून अतिक्रमण हटविण्यासाठी बंदोबस्त देण्यात यावा, अशी मागणी केली असल्याचे अतिक्रमण निर्मूलन विभागातर्फे सांगण्यात आले.

पोलिस बंदोबस्त देणार

अतिक्रमण निर्मूलन विभागातर्फे माहिती देताना सांगण्यात आले आहे, की पोलिसांनी बंदोबस्त देण्याची तयारी दर्शविली आहे. त्यामुळे आता फुले मार्केटमधील अतिक्रमण हटविण्याची कारवाई करण्याच्या मंजुरीबाबत उपायुक्तांकडे टिपणी ठेवण्यात आली आहे. त्यांनी मंजुरी दिल्यास कारवाई करण्यात येईल.