रावेर : तालुक्यात शनिवारी रात्री अचानक वादळी पावसाच्या तडाख्यामुळे केळीसह मका व गव्हाचे सुमारे साडेचारशे शेतकऱ्यांच्या तीनशे हेक्टर क्षेत्रातील पिकांचे सुमारे सात कोटी रुपयांचे नुकसान झाल्याचा प्राथमिक अहवाल कृषी व महसूल विभागातर्फे सादर करण्यात आला. यात सर्वाधिक सव्वासहा कोटी रुपयांची केळी झाडे जमीनदोस्त होऊन शेतकऱ्यांचे नुकसान झाले. 

तालुक्यात शनिवारी रात्री सात ते आठच्या सुमारास जोरदार वादळी पावसाचा तालुक्याला तडाखा बसला. महसूल व कृषी विभागाने सोमवारी पिकांच्या नुकसानीचा प्राथमिक अहवाल सादर केला. त्यानुसार तालुक्यातील २९ गावांतील २६० शेतकऱ्यांच्या १५५.९० हेक्टर क्षेत्रातील केळी पिकाचे सहा कोटी २३ लाख ६० हजार रुपयांचे नुकसान झाले. तर ३१ गावांतील २०५ शेतकऱ्यांच्या १४५.१६ हेक्टर क्षेत्रातील मका पिकाचे ७२ लाख ५८ हजार रुपयांचे नुकसान झाले. तर एका गावातील २.५० हेक्टर क्षेत्रातील तीन शेतकऱ्यांच्या गहू पिकाचे १२ लाख ५० हजार रुपयांचे नुकसान झाले आहे. असे ४६८ शेतकऱ्यांच्या ३०३.५६ हेक्टर क्षेत्रातील केळी, मका, गहू या पिकांचे एकूण सहा कोटी ९७ लाख ४३ हजार रुपयांचे नुकसानीचा प्राथमिक अहवाल कृषी व महसूल विभागातर्फे वरिष्ठांना सादर करण्यात आला आहे. 

संपादन- भूषण श्रीखंडे