जळगाव : निसर्गमित्र जळगावतर्फे जागतिक चिमणी दिनानिमित्त तीनदिवसीय ऑनलाइन झालेल्या चिमणी गणनेत (Sparrow Count) महाराष्ट्रातील ३१ व अन्य राज्यातील दोन, अशा एकूण ३३ जिल्ह्यांतील नागरिकांनी सहभाग घेत एकूण सात हजार ८९१ चिमण्यांची नोंद केली. (sparrow count activity 8000 sparrows recorded from 31 districts in state jalgaon news)

१८ ते २० मार्च, असे तीन दिवस हा महाराष्ट्रव्यापी चिमणी गणनेचा उपक्रम राबविण्यात आल्याची माहिती पक्षीमित्र शिल्पा व राजेंद्र गाडगीळ यांनी दिली.

असा मिळाला प्रतिसाद

यात राज्यातील विविध जिल्ह्यांमधील नागरिकांनी उत्स्फूर्त सहभाग घेतला. त्यानुसार जळगावातून ७०, पुणे २७, कोल्हापूर २५, सांगली २४, नगर २२, नाशिक १६, धुळे १२, ठाणे १२, मुंबई ८, अमरावती ८, यवतमाळ ५, लातूर ४, सोलापूर ४, चंद्रपूर ४,

पालघर ३, अकोला ३, सातारा ३, नागपूर २, भंडारा ३, रत्नागिरी २, वाशीम २, रायगड २, बुलढाणा २ नंदुरबार २, छत्रपती संभाजीनगर २, जालना १, गोंदिया१, वर्धा १, नांदेड १, सिंधुदुर्ग १, हिंगोली १, तसेच मध्य प्रदेशातील भोपाळ आणि कर्नाटक येथील बंगळुरूमधून प्रत्येकी १ याप्रमाणे नागरिक सहभागी झालेत.

हेही वाचा: झोप नीट लागायला हवी? मग हे वाचाच

चिमण्यांच्या नोंदीत जळगाव अव्वल

प्रत्येक जिल्ह्यातून नागरिकांनी त्यांनी केलेल्या चिमण्यांच्या संख्येची नोंद ऑलनाइन पद्धतीने पाठविली. त्यानुसार जळगाव जिल्ह्यातून सर्वाधिक १,७०३ चिमण्यांची नोंद मोर आली. पुणे जिल्ह्यातून १,३४७, नाशिक १,१८३, सांगली ६१३, कोल्हापूर ५७५ आणि नगर जिल्ह्यातून ३३१ चिमण्या नोंदविण्यात आल्याचे समोर आले.

"चिमण्यांची संख्या आपल्या भागात किती हे समजावे, त्या का कमी होत आहेत, याविषयी जागरूकता निर्माण व्हावी व चिमणीविषयी प्रेम व पर्यावरणाविषयी आस्था वाढावी हा या उपक्रमामागचा उद्देश होता." -शिल्पा व राजेंद्र गाडगीळ