Jalgaon Crime News : जोशीपेठेतील सोने रिफायनरी दुकानात चोरट्यांनी मंगळवारी (ता. १३) पहाटे पाचला डल्ला मारला. दुचाकीने आलेल्या दोन्ही चोरट्यांनी कुलूप तोडून दुकानात प्रवेश केला. (Thieves looted Sarafa Refinery with gold worth 4 lakhs jalgaon crime news)

सुमारे चार लाख रुपयांचे सोने, चांदी घेऊन चोरटे पसार झाले. स्टेट बँक दरोडा, जळकेतील सराफा दुकान फोडल्यानंतर आता चोरट्यांनी थेट सराफ बजारावरच लक्ष केंद्रीत केले असून, जोशी पेठेतील सराफा रिफायनरीच फोडून ऐवज लंपास केला.

जोशी पेठेत जितेंद्र राजाराम जगताप यांच्या मालकीचे सराफा रिफायनरी कारखाना वजा दुकान आहे. मंगळवारी पहाटे पाचच्या सुमारास रथ गल्लीतून एका दुचाकीने चोरटे जोशीपेठेत पोचले. त्यांनी सोने, चांदीचे टंच काढून देणाऱ्या राज रिफायनरीचे कुलूप कटरच्या साहाय्याने तोडून आत प्रवेश केला.

काही वेळ दुकानात शोधाशोध करीत एका चोरट्याने काऊंटर तोडले. त्यातून सुमारे चार लाख रुपयांचे सोने काढून नेले. दुकानमालक जगताप सकाळी दुकान उघडण्यासाठी आल्यावर हा प्रकार उघडकीस आला. त्यांनी शनिपेठ पोलिस ठाण्यात माहिती दिली.

हेही वाचा : Credit Card फसवणूक....काय घ्याल काळजी?

माकड टोपी-जॅकेट घालून चोरी

पोलिसांनी सीसीटीव्ही फुटेज संकलित केले असून, त्यात दुचाकीवरून दोन चोरटे आलेले दिसत आहेत. नंबर प्लेटवर चार अंकांपैकी पुढील अंक दिसत नसून उर्वरित तीन अंक ७०० असे आहेत. चोरट्यांपैकी एकाने काळ्या रंगाचे जॅकट व पांढरी पँट घातली आहे, तर दुसऱ्याने निळ्या रंगाचे जॅकेट परिधान केले आहे. तोंड झाकले जावे, यासाठी माकड टोपी घातली असून, राखाडी रंगाचे मफलर तोंडाला गुंडाळले आहे. याच चोरट्याने काऊंटर फोडून ऐवज लुटला आहे.

कुलूप कटरने तोडले

दुकानाचे कुलूप तोडण्यासाठी कटरचा वापर केला आहे. पिवळ्या रंगाचे कटर सीसीटीव्ही फुटेजमध्ये दिसत आहे. दोन्ही चोरटे २५ ते ३० वयोगटातील असल्याचे समोर आले आहे. शनिपेठ पोलिसांत गुन्ह्याची नोंद झाली असून, स्थानिक गुन्हे शाखेच्या पोलिसांनी चोरट्यांचा शोध सुरू केला आहे. वारंवार घडणाऱ्या गुन्हेगारी घटनांमुळे पोलिस दलाच्या कार्यक्षमतेवर प्रश्नचिन्ह उपस्थित होत आहे.