कुऱ्हा काकोडा : जंगलात गस्त घालत (Patrolling the forest)व्याघ्र प्रगणना करत असताना रानटी डुकरांच्या शिकारीसाठी लहान बाँबगोळे घेऊन फिरणाऱ्या एकाला हटकल्याने त्याने वनरक्षकालाच (forest ranger) दगडाने मारहाण केल्याची घटना वढोदा जंगलात घडली. त्यात वनरक्षकाच्या हाताला जबर दुखापत होऊन टीच पडली आहे.

वढोदा वनपरिक्षेत्रातील नियतक्षेत्र वढोदा पूर्वमध्ये वनरक्षक ज्ञानोबा धुळगंडे गस्त घालत होते. सोबतच अखिल भारतीय व्याघ्र प्रगणना अंतर्गत मांसभक्षी प्राण्यांची गणना करत होते. तेव्हा वनखंड ५६१ मध्ये हलखेडा येथील फासेपारधी रहीम पवार त्याच्याजवळ रानडुकराची शिकार करण्यासाठी वापरण्यात येणारे लहान बाँबगोळे घेऊन जात असताना त्यांना आढळून आला. या वेळी धुळगंडे यांनी त्याला हटकले असता पवारने त्यांच्यावर दगडफेक केली. त्यात धुळगंडे यांच्या डाव्या हाताला जबर दुखापत झाली. पवार याने वनरक्षक धुळगंडे यांना शिवीगाळ करत शासकीय कामात अडथळा निर्माण केला. पवार याने दगडफेक सुरू केल्यामुळे धुळगंडे तेथून माघारी फिरले. याप्रकरणी वनरक्षक धुळगंडे यांनी दिलेल्या फिर्यादीवरून मुक्ताईनगर पोलिसात संशयित रहीम पवार याच्याविरोधात शासकीय कामात अडथळा आणणे व शासकीय कर्मचाऱ्याला दुखापत करणे अशा विविध कलमांखाली गुन्हा दाखल झाला आहे. पोलिस निरीक्षक राहुल खताळ यांच्या मार्गदर्शनाखाली उपनिरीक्षक परवीन तडवी, कुऱ्हा चौकीचे सहाय्यक फौजदार माणिक निकम, पोलिस कर्मचारी हरीश गवळी, संजय लाटे, राहुल नावकर, सागर सावे आदी तपास करीत आहेत.

कर्मचाऱ्यांच्या सुरक्षेचा प्रश्‍न ऐरणीवर

वढोदा वनक्षेत्रातील वनखंड ५६१ मध्ये पट्टेदार वाघाचा अधिवास असून, २२ डिसेंबरला वनखंडाच्या शेजारीच असलेल्या वनखंड ५६२ मध्ये पट्टेदार वाघाने गोऱ्हा आणि गायीला ठार केले आहे. अशा संवेदनशील जंगलात वन्यप्राण्यांची शिकार करण्यासाठी वापरात आणले जाणारे बाँबचे लहान गोळे घेऊन फिरणे हे वाघाच्या अस्तित्वासाठी धोकादायक आहे. वनक्षेत्राला कायम वनक्षेत्रपाल नाही. प्रभारी अधिकारी कारभार सांभाळत आहे. वाघाच्या सुरक्षेसोबतच कर्मचाऱ्यांच्या सुरक्षेचा प्रश्नसुद्धा निर्माण झाला आहे.