Jalgaon News : तालुक्यातील नायगाव - किनगाव रस्त्यावर पश्चिम वन विभागाच्या गस्ती पथकाने बोलेरो पीकअप व्हॅन वाहनासह पाच लाख रुपये किमतीचे खेर जातीचे मौल्यवान लाकूड जप्त केले आहे.

अंधाराचा फायदा घेत घटनास्थळावर वाहन सोडून चालक पसार झाला आहे. (Timber seized by patrolling team of Forest Department jalgaon crime news)

वन विभागाला मिळालेल्या गुप्त माहितीवरून मंगळवारी (ता. २) यावलच्या वनपाल गस्ती पथक व रेंज स्टाफ यावल पश्चिमसह शासकीय वाहनाने नायगाव - किनगाव मार्गावरील रस्त्यावर गस्त होते. या वेळी किनगावकडे जात असताना बोलेरो पीकअप हे संशयित वाहन भरधाव वेगाने जात असता त्याला थांबविण्याचा प्रयत्न केला असता चालक वाहन सोडून अंधारात पसार झाला.

या वाहनाची तपासणी केली असता त्यात खैर प्रजातीचे लाकूड मिळून आले. वाहन जप्त करून शासकीय विक्री आगार यावल येथे आणून पावतीने जमा करण्यात आले असून, जप्त माल महिंद्रा बोलेरो पिकअप चारचाकी वाहन (क्रमांक एमएच ०४, जीआर ५३४३) या वाहनासह त्यात असलेले खैर जातीचे अंदाजे ५.००० घन मीटर लाकूड व वाहन तसेच मालाची बाजार भावानुसार अंदाजित किंमत ५ लाख रुपये एवढी आहे.

या कार्यवाहीत गस्ती पथकात वनपाल आर. बी. थोरात, वनपाल (वाघझिरा) विपुल पाटील, वनरक्षक (निंबादेवी) अक्षय रोकडे, वनरक्षक (मनुदेवी) चेतन शेलार, वाहनचालक योगिराज तेली तसेच पोलिस कर्मचारी सचिन तडवी यांनी सहभाग घेतला.

ही कार्यवाही धुळ्याचे वनसंरक्षक हृषिकेश रंजन, यावल उपविभागाचे उपवन संरक्षक जमीर शेख, विभागीय वनधिकारी (दक्षता पथक धुळे) आर. आर. सदगीर, सहाय्यक वनसंरक्षक (यावल) प्रथमेश हडपे, वनक्षेत्रपाल अजय बावणे यांच्या मार्गदर्शनाखाली करण्यात आली आहे.

वन विभागाकडून आवाहन

वन व वन्यजीव तसेच अवैध वाहतूक लाकूड संबंधित गैरप्रकार निदर्शनास आल्यास तत्काळ टोल फ्री क्रमांक १९२६ या क्रमांकावर संपर्क करावा, असे आवाहन वन विभागातर्फे करण्यात आले आहे, असे आवाहन वन क्षेत्रपाल (गस्ती पथक) तसेच वनक्षेत्रपाल (यावल, पश्चिम) यांच्याकडून करण्यात आले आहे.