रावेर (जि. जळगाव) : एका आदिवासी महिलेला जबरदस्तीने दोन लाख रुपयांत विकून तिच्याशी लग्न लावून अत्याचार केल्याप्रकरणी मध्य प्रदेशातील उज्जैन येथील आठ जणांविरुद्ध रावेर पोलिस ठाण्यात गुन्हा दाखल झाला आहे.

पाल (ता. रावेर) येथील एका आदिवासी महिलेस दोन अनोळखी महिला, तसेच राकेश वर्मा, शामू वर्मा, भगीरथ वर्मा, कमल वर्मा, दिनेश वर्मा व तेजू (पूर्ण नाव माहीत नाही. रा. घोयला. जि. खरगोन, मध्य प्रदेश) यांनी नाश्त्यामध्ये गुंगीचे औषध दिले. ती बेशुद्ध असताना, तिची दोन लाखांत विक्री करून लग्न करण्याच्या उद्देशाने तिला पळवून नेऊन. रावेर बसस्थानक, घोयला येथील घरी व इतर ठिकाणी राकेश वर्मा याने महिलेशी लग्न करून अत्याचार केला व ठार मारण्याची धमकी दिली. या महिलेस इतरांनी डांबून मारहाण केली. याबाबत पीडित महिलेने दिलेल्या फिर्यादीवरून रावेर पोलीस ठाण्यात दोन अनोळखी महिलांसह आठ जणांविरुद्ध गुन्हा दाखल झाला आहे. पोलिस उपअधीक्षक कुणाल सोनवणे तपास करीत आहेत.