Jalgaon News : ‘मला राजकारणाची आवड असून, समाजकार्य करण्यासाठी मला लोकसभा किंवा विधानसभाही चालणार आहे. माझा आवडता पक्ष भाजप असून, मला अशी काही ऑफर आली, तर नक्कीच विचार करू.

त्यामुळे निवडणूक लढवण्याची संधी दिली, तर नक्कीच लढवू’, अशी इच्छा तालुक्याचे भूमिपुत्र, ट्रिपल महाराष्ट्र केसरी तथा लाचलुचपत विभागाचे अप्पर पोलिस अधीक्षक विजय चौधरी यांनी व्यक्त केली. (Triple Maharashtra Kesari Vijay Chaudhary statement about loksabha election jalgaon news)

खासगी वृत्तवाहिनीशी बोलताना चौधरी यांनी आपल्या भावना व्यक्त केल्या. दरम्यान, विजय चौधरी यांच्या या मुलाखतीची व्हिडिओ क्लीप गुरुवारी (ता. ३०) दिवसभर तालुक्यात चर्चेचा विषय ठरली होती. त्यांनी राजकारणाच्या आखाड्यात उतरण्याचे केलेले हे सूतोवाच असल्याचे दिसून येत आहे.

तालुक्यातील भूमिपुत्र असलेले विजय चौधरी निवडणुकीत उभे राहिल्यानंतर कसे चित्र असेल, याचा अंदाज ग्रामीण भागात आतापासूनच बांधला जात आहे. जळगावचे विद्यमान खासदार उन्मेष पाटील यांना पुन्हा उमेदवारी मिळण्याच्या शक्यतेसंदर्भात त्यांच्याच पक्षाचे पदाधिकारी अद्याप ठोसपणे भूमिका मांडताना दिसत नाहीत.

मध्यंतरी सरकारी वकील ॲड. उज्ज्वल निकम यांच्या नावाचीही चर्चा होती. भाजपकडून सध्या विशेषतः लोकसभेसाठी वातावरणनिर्मिती केली जात असताना विजय चौधरी यांनी व्यक्त केलेल्या त्यांच्या विचारांना राजकीयदृष्ट्या महत्त्व प्राप्त झाले आहे. भाजपमध्ये उमेदवारी देताना नेहमीच धक्कातंत्राचा वापर केला जातो. जळगाव लोकसभेसाठी अनेक नावे चर्चेत असताना अचानक उन्मेष पाटील यांची उमेदवारी जाहीर झाली होती.

त्यामुळे आगामी निवडणुकीतही याच धक्कातंत्राचा वापर होण्याची शक्यता आहे. अर्थात, विजय चौधरी यांना अद्याप कोणत्याही राजकीय पक्षाकडून ऑफर आलेली नसली तरी त्यांनी व्यक्त केलेली इच्छा पाहता, भाजपकडून काय निर्णय घेतला जाते, हे पाहणे औत्सुक्याचे ठरणार आहे. दरम्यान, यासंदर्भात विजय चौधरी यांच्याशी संपर्क साधण्याचा प्रयत्न केला असता, तो होऊ शकला नाही.