Jalgaon Crime News : बदरखे (ता. पाचोरा) येथील पेमबुवा यात्रेतील तमाशा फडाजवळ आढळलेल्या हनुमंतखेडा येथील तरुणाच्या मृतदेह प्रकरणी पोलिसांत खुनाचा गुन्हा दाखल करण्यात आला असून, पोलिस मारेकऱ्यांचा शोध घेत आहेत.

तमासगिरांसह मनोज सोबत गेलेल्या मित्रांची चौकशी पोलिसांनी सुरू केली आहे. (young man of Hanumantkheda was killed in yatra jalgaon crime news)

हनुमंतखेडा येथील मनोज ज्ञानेश्वर निकम (वय २६) या तरुणाचा मृतदेह बदरखे येथे यात्रोत्सवानिमित्त आयोजित शालिग्राम शांताराम रोहिणीकर तमाशा फडाजवळ सोमवारी (ता. २५) सकाळी आढळून आला होता. नगरदेवळा दूरक्षेत्र पोलिसांनी तत्काळ घटनास्थळी भेट घेऊन पंचनामा करून मृतदेह पाचोरा ग्रामीण रुग्णालयात आणला. परंतु डॉक्टरांनी मृताच्या उजव्या पायाच्या गुडघ्या मागची नळी व बरगड्या तुटलेल्या असल्याचे सांगितल्याने शवविच्छेदनासाठी मृतदेह जळगावच्या शासकीय रुग्णालयात पाठविण्यात आला होता.

तेथे शवविच्छेदन करून मृतदेह ताब्यात दिल्यावर हनुमंतखेडा येथे अंत्यसंस्कार करण्यात आले होते. या प्रकरणी पोलिसांनी दोन दिवसानंतर खुनाचा गुन्हा दाखल केला. शेतमजुरी व वाहनचालक म्हणून काम करणारा मृत मनोज निकम हा २४ डिसेंबरला सायंकाळी बदरखे येथील यात्रेत गेला होता. सोमवारी (ता. २५) प्रकाश राठोड याने मनोजचा चुलत भाऊ नंदकिशोर पाटील याला फोन करून सांगितले, की बदरखे यात्रेत तमाशा फडाजवळ मनोज पडला आहे.

तो कोणतीही हालचाल करत नाही. तू गाडी घेऊन ये. त्यामुळे मृत मनोजचे चुलत काका विजय निकम यांच्या चारचाकी गाडीने तुकाराम निकम व विजय निकम हे बदरखे येथे पोहोचले. तेथे चुलत भाऊ किरण निकम व इतरांकडून सांगण्यात आले, की मनोज हा पवन (लकी) निकमसोबत मनोजच्या दुचाकीने तमाशा पाहण्यासाठी आले होते. मनोजच्या पाठीवर, खांद्यावर गंभीर जखमा दिसून आल्याने त्यांचा संशय बळावला. त्यामुळे जळगाव येथे शवविच्छेदन करण्यात आले.

तपासचक्रे गतिमान

नंदकिशोर पाटील यांनी पोलिसात मनोजचा खून झाल्याची तक्रार दिल्याने खुनाचा गुन्हा दाखल करण्यात आला आहे. चाळीसगाव उपविभागाचे उपअधीक्षक रमेश चोपडे, पाचोरा विभागाचे धनंजय, स्थानिक गुन्हे शाखेचे निरीक्षक किसनराव नजन पाटील आदींनी घटनास्थळाची पाहणी करून तपासचक्र गतिमान केली आहेत. पोलिस उपअधीक्षक धनंजय येरूळे यांच्या मार्गदर्शनाखाली पोलिस निरीक्षक राहुल खताळ तपास करीत आहेत.