खेड : तालुक्यातील लोटे परशुराम औद्योगिक वसाहतीला (Lote Parshuram Industrial Estate) पाऊस व वादळीवारा यांचा जोरदार फटका बसला. औद्योगिक वसाहतीमध्ये श्रेयस इंटर मिजिएट या रासायनिक कारखान्याची (Chemical Factories) ३२ मीटर उंचीची चिमणी कोसळून कोट्यवधीचे नुकसान झाले आहे.

पाऊस (Khed Rain) आणि वादळी वाऱ्यामुळे लोटे औद्योगिक वसाहतीतील अनेक छोट्या मोठ्या कारखान्यांना फटका बसला. अनेक छोट्या मोठ्या कारखान्यांचे पत्रे उडाले. श्रेयस इंटरमिजिएट लिमिटेड (Shreyas Intermediate Limited) या रासायनिक कारखान्याची ३२ मीटर उंचीची थर्मिक फ्लुईड चिमणी कारखान्याच्या आवारातील इतर तीन इमारतींवर कोसळली. सुदैवाने कोणत्याही प्रकारची मनुष्यहानी व कामगार जखमी झाले नाहीत.

मात्र या तीन इमारतींचे आणि चिमणीचे असे मिळून सुमारे एक कोटींचे नुकसान झाल्याचे कारखान्याचे जनरल मॅनेजर अनंत महाडिक यांनी सांगितले. कारखान्यामधील आणखी काही इमारतींचे पत्रे उडून दूरवर फेकले गेले. परंतु सुदैवाने कोणी कामगार जखमी झाले नाहीत. वादळी वाऱ्याचा जोर एवढा प्रचंड होता की एवढी मजबूत बांधकाम असलेली थर्मिक फ्लूईडची चिमणी कोसळून पडली आणि तीन इमारतींचे फार मोठ्या प्रमाणावर नुकसान झाले. घडलेल्या घटनेबाबत संबंधित यंत्रणांना आम्ही वेळीच कळविले आहे असेही महाडिक यांनी सांगितले.