चिपळूण (रत्नागिरी) :  लॉकडाऊनच्या काळात हातावर पोट असलेल्या लोकांना जीवनावश्यक वस्तू पुरवण्याची जबाबदारी अनेकांनी घेतली. मात्र उनार गुरांचा कोणीही वाली नाही. 
ही जबाबदारी शिरळ येथील अनिकेत बापट या तरूणाने घेतली आहे. लॉकडाऊनच्या काळात हा तरूण 10 उनार गुरांना चारा - पाणी पुरवत आहे. 

चिपळूण ते शिरळ मार्गावर गोवंश उनार फिरतात. या मार्गावरील हॉटेलचे मालक हॉटेलमधील शिल्लक पदार्थ त्यांना खायला द्यायचे. रस्त्यावर अनेक ठिकाणी भाजी विक्री व्हायची. सुकलेली आणि विक्री योग्य नसलेली भाजी विक्रेते रस्त्याच्याकडेला टाकून द्यायचे. ते खाऊन ही उनार गुरे आपला गुजरान करायची.

हेही वाचा- गुड न्यूज : सेंट लुक्‍स पुन्हा सुरू होणार

लॉकडाऊनमध्ये हा तरूण उनार गुरांना पुरवतोय चारा

मात्र लॉकडाऊनमुळे हॉटेल व इतर व्यवसाय ठप्प आहेत. त्यामुळे उनार गुरांच्या चार्‍याचा प्रश्‍न निर्माण झाला आहे. शिरळ येथे बापट यांची कोकणगीड्ड प्रगती गोशाळा आहे. सात एकरच्या या गोशाळेत ते 17 गोवंश संभाळतात. लॉकडाऊनच्या काळात चिपळूण ते शिरळ प्रवास करताना त्यांना या मार्गावरील उनार गुरांचा प्रश्‍न लक्षात आला. त्यानंतर उनार फिरणार्‍या 10 गुरांच्या चार्‍याची जबाबदारी बापट यांनी घेतली. त्यांनी गोशाळेच्या परिसरात साडेतीन एकर क्षेत्रावर हिरव्या गवताची लागवड केली आहे. उनार गुरांच्या चार्‍यासाठी त्यांनी या गवताची कापणी सुरू करून हिरवा चारा आणि पाण्याची व्यवस्था केली आहे. 

हेही वाचा-जन्मप्रमाणाबाबत या जिल्ह्याचा आदर्श घ्यावाच

चार्‍यासाठी वणवण भटकणार्‍या या गायी आणि त्यांच्या वासरांकडे बघून मन सुन्न होते. त्यामुळेच शक्य असलेले प्रयत्न करून मी त्यांच्या चार्‍याची व्यवस्था केली आहे. माझी सर्व प्राणीप्रेमींना विनंती आहे. तुमच्या घरासमोर एखादे गोवंश आले तर त्याला कधीही शिजवलेले अन्न, मैदायुक्त पदार्थ घालू नका. ते त्यांचे अन्न नाही.  प्रत्येकाची पचन प्रक्रिया वेगवेगळी असते. या पदार्थांचा त्यांना त्रासच होऊ शकतो. त्या ऐवजी गवत, पेंढा, शेंगदाणा पेंड असे  खाणे द्या.

अनिकेत बापट