वैभववाडी : अरुणा धरणाची घळभरणी तीन वर्षांपूर्वी होऊन त्यातून पाणी वाहू लागले, पण प्रकल्पग्रस्तांच्या डोळ्यांतील अश्रू वाहण्याचे थांबलेले नाही. सध्या धरणातील साठा कमी झाल्यामुळे पाण्याखाली बुडालेल्या घरांनी पुन्हा एकदा मोकळा श्वास घेतला आहे. त्या घरांसोबत वर्षानुवर्षे जोडलेली नाती देखील पुनरुज्जीवित झाली आहेत. या धरणामुळे पाच हजार ३१० हेक्टर क्षेत्र सिंचनाखाली येणार असल्याचे सांगण्यात येत आहे

अरुणा प्रकल्पांच्या कामाला २००६ मध्ये सुरुवात झाली.या प्रकल्पाच्या बुडीत क्षेत्रात आखवणे, भोम आणि नागपवाडी अशी तीन गावे येतात तर प्रकल्पाच्या लाभक्षेत्रात सिंधुदुर्ग जिल्ह्यातील १७ आणि रत्नागिरी जिल्ह्यातील दोन गावे येतात. प्रकल्पाचे काम सुरू झाल्यानंतर तब्बल तेरा वर्षानंतर जानेवारी २०१९ मध्ये पाटबंधारे विभागाने घळभरणीला सुरुवात केली. कोणतीही पूर्वकल्पना न देताच घळभरणी सुरू करण्यात आली, असा आक्षेप नोंदवीत प्रकल्पग्रस्तांनी काम बंद पाडले. परंतु प्रशासनाने पोलिस बळाचा वापर करीत प्रकल्पाच्या घळभरणीचे काम सुरू केले. पहिल्या टप्प्याचे काम १५ मे २०१९ पूर्वीच झाले.

अलीकडे या धरणातून विसर्ग सुरू आहे. पाणी जसजसे कमी होत आहे. तसे तीन वर्षांपूर्वी बुडालेल्या घरांचे अवशेष दिसू लागले आहेत. वर्षानुवर्षे राहत असलेली घरे दिसू लागल्यामुळे कुटुंबाची त्या घरांशी जोडलेल्या नात्याला पुन्हा उजाळा मिळत आहे.

अरुणा धरणाची उभारणी

• २००५ मध्ये ५४ कोटीचा निधी मंजूर

• निधी अभावी काम धीम्यागतीने

• पाच हजार ३१० हेक्टर क्षेत्र सिंचनाखाली येणार

• धरणाच्या कामाला २००६ मध्ये प्रत्यक्षात सुरुवात

• प्रधानमंत्री सिंचन योजनेतर्गंत सुधारित १६०० कोटींची मान्यता

• आतापर्यंत १२०० कोटींपेक्षा जास्त निधी खर्च

प्रशासनातील अधिकाऱ्यांच्या अक्षम्य चुकीचे आम्ही बळी आहोत.त्यामुळे या प्रकाराविरोधात आमचा लढा सुरूच राहणार आहे.घरे बुडालेल्यांना नुकसानभरपाई द्या आणि नंतरच उर्वरित काम सुरू करा.

- तानाजी कांबळे, अध्यक्ष,संघर्ष समिती.