सावंतवाडी : आमदार नीतेश राणे यांच्यावर राज्य सरकारने सूडबुद्धीने केलेल्या कारवाईबाबत काळ आणि वेळ बघून उत्तर देणार असल्याचा सूचक इशारा माजी मुख्यमंत्री तथा गोवा राज्याचे प्रभारी देवेंद्र फडणवीस यांनी आज दिला. न्यायालयाने जामीन दिल्यानंतर गोवा येथे आमदार नीतेश राणे यांनी त्यांची भेट घेतली. त्या दरम्यान ते पत्रकारांशी बोलत होते. (Devendra Fadnavis Meet Nitesh Rane)

संतोष परब हल्ल्याप्रकरणी न्यायालयाने जामीन दिल्यानंतर राणे यांनी थेट गोवा गाठले. तेथे पंतप्रधान नरेंद्र मोदी यांच्या सभेला उपस्थिती लावली. सभा संपल्यानंतर आमदार राणे यांनी फडणवीस यांची म्हापसा येथे भेट घेतली. यावेळी फडणवीस यांनी राणे यांची आपुलकीने विचारपूस करत जिल्हा बँकेतील यशाबद्दल शुभेच्छा दिल्या. त्यानंतर बंद दरवाजाआड दोघांचीही बैठक पार पडली. यावेळी त्यांच्यासोबत जिल्हा बॅंकेचे अध्यक्ष मनीष दळवी, कणकवली नगराध्यक्ष समीर नलावडे, राकेश परब आदी होते.

पत्रकारांशी बोलताना फडणवीस म्हणाले, ‘‘राणे यांच्यावरील कारवाईबाबत आपण आत्ताच बोलणार नाही. वेळ आणि काळ बघून उत्तर देण्यात येईल." आमदार राणे म्हणाले, ‘‘फडणवीस यांनी आपल्याला जामीन मिळण्यासाठी प्रयत्न केले. त्यासाठी त्यांची आपण भेट घेतली. त्यांच्यासोबत चर्चा केली. काळ आणि वेळ बघून भूमिका घेऊ, असा शब्द त्यांनी दिला. सध्या तरी माझ्यासाठी पक्ष प्रथम असून गोवा विधानसभा निवडणुकीसाठी पुढचे काही दिवस आपण पक्षासाठी काम करणार आहे. सिंधुदुर्ग आणि गोव्याशी संबंधित लोकांच्या गाठीभेटी घेणार आहे.’’