वैभववाडी : तळेरे (ता. वैभववाडी) कोल्हापूर मार्गावर अपघातांची मालिका सुरूच आहे. एडगाव येथील रामेश्वर सर्व्हिसिंग सेंटरनजीक आज पहाटे ५.३० वाजता मिनीबसचा अपघात झाला. चालकाला डुलकी लागल्याने ही घटना घडली. यात दोघे प्रवासी जखमी झाले आहेत.

मुंबईहून गोव्याच्या दिशेने जाणारी मिनीबस (एमएच ४७ वाय २५२२) झाडावर धडकली. या अपघातात दोन प्रवासी जखमी झाले. शीतल चप्पा (वय ३७) व प्रकाश मंथानिया (वय ३३) हे दोन प्रवासी जखमी झाले. त्यांच्यावर ग्रामीण रुग्णालयात प्रथमोपचार करून अधिक उपचारासाठी त्यांना कणकवलीतील खासगी रुग्णालयात हलविण्यात आले आहे.

मुंबईतील एका कंपनीत काम करणारे हे सर्व कर्मचारी आहेत. सहलीनिमित्त हे सर्वजण मिनीबसने गोव्याला निघाले होते. याच दरम्यान एडगाव येथे चालकाला झोप आल्यामुळे गाडी रस्त्याकडेच्या झाडावर आदळली. या अपघातात गाडीच्या दर्शनी भागाचे मोठे नुकसान झाले. ही धडक एवढी भीषण होती की, गाडीच्या डाव्या बाजूचा चक्काचूर झाला. या अपघातानंतर एडगाव येथील तरुण मदत कार्यासाठी धावले. येथील हेमंत रावराणे, सचिन रावराणे, रवि रावराणे, नीलेश रावराणे, रोहन सुतार, बच्चाराम रावराणे या तरुणांनी पोलिस येण्यापूर्वीच जखमींना रुग्णालयात दाखल केले. या बसमध्ये एकूण १८ प्रवासी होते. त्यामध्ये दोन लहान मुलांचा समावेश होता. या सर्व प्रवाशांच्या नाश्त्याची सोय एडगावचे माजी सरपंच राजेंद्र सुतार यांनी केली. अपघाताची माहिती मिळताच कॉन्स्टेबल रमेश नारनवर, नितीन खाडे, संदीप राठोड घटनास्थळी दाखल झाले. गेले तीन दिवस या गावच्या हद्दीत तीन मोठे अपघात झाले. सुदैवाने तीन्ही घटनांमध्ये जीवितहानी टळली.

२४ तास ड्रायव्हिंग

एडगाव येथे शनिवारी झालेल्या अपघातातातील चालक २४ तास बस चालवत होता. शुक्रवारी पहाटे मुंबईहून बस निघाली होती. त्या चालकाला विश्रांती मिळाली नव्हती. अखेर एडगाव येथे शनिवारी पहाटे बस आली असता चालकाचा डोळा लागला आणि गाडी झाडावर जाऊन धडकली. सुदैवाने मोठा अनर्थ टळला.