चिपळूण : गणेशोत्सवासाठी (Ganeshotsav) मुंबई, पुण्यातील चाकरमानी मोठ्या प्रमाणात महामार्गाने गावी येण्यासाठी निघाले आहेत. त्यामुळे कालपासून महामार्गावर (Mumbai-Goa Highway) वाहनांची गर्दी दिसत आहे. मुंबईतून कोकणात येणाऱ्या चाकरमानांना कशेडी बोगद्यातून (Kashedi Tunnel) प्रवेश दिला जात आहे.

खेडहून मुंबईकडे जाणाऱ्या लोकांना जुन्या कशेडी घाटमार्गे प्रवेश दिला जात आहे. त्यामुळे काही अंतरावर वाहतूक कोंडीचा प्रश्न निकाली निघाला आहे. गणेशोत्सवासाठी गावी येणाऱ्या चाकरमानांच्या खासगी चारचाकी वाहनांची संख्या महामार्गावर मोठी होती.

तसेच सकाळपासून एसटी बस, मिनी बस, खासगी प्रवासी वाहतूक करणाऱ्या बसेस आणि ट्रॅव्हल्स कंपन्यांच्या वाहनांची संख्या मोठी होती. चाकरमानी स्वतःच्या दुचाकी, चार चाकी आणि तीन चाकी वाहनांनी गावाकडे येत होते. शहरातील बहादूरशेख नाका येथे नेहमी वाहतुकीची कोंडी होते. जिल्हा पोलिस अधीक्षक धनंजय कुलकर्णी, जिल्हाधिकारी एम. देवेंद्र सिंग यांनी शनिवारी शांतता कमिटीच्या बैठकीनंतर बहादूरशेख नाक्याची पाहणी केली. येथे वाहतूक कोंडी होऊ नये अशा पोलिसांना सूचना केल्या.

काल उपविभागीय पोलिस अधिकारी राजेंद्रकुमार राजमाने सकाळी आठ वाजल्यापासून बहादूरशेख नाक्यावर उभे राहून वाहतूक सुरळीत करण्यासाठी कर्मचाऱ्यांसह प्रयत्न करीत होते. बहादूरशेख नाक्यावरून मुंबईकडे, चिपळूण शहरात, गोव्याकडे आणि कराडच्या दिशेने जाण्यासाठी चार मार्ग आहेत. चारही मार्गावरील वाहने बहादूरशेख नाक्यावरील सर्कलवर आली तर वाहतूक कोंडी होण्याची शक्यता आहे. त्यामुळे तीन मार्गावरील वाहने थांबून एका मार्गावरील वाहने सोडली जात होती.