रत्नागिरी : हॅकरच्या ताब्यातून व्हॉट्‌सॲप अकाउंट परत मिळवायचे होते. बऱ्याच शक्‍यतांवर विचार केला, काही आराखडे बांधले. सीमकार्ड डीॲक्‍टिव्हेट ठेवले. जेणेकरून हॅकरला पुन्हा व्हॉट्‌सॲपचा ताबा मिळू नये. व्हॉट्‌सॲपकडेही तक्रार दाखल केली. आठ दिवसांतच तयार केलेली हॅकिंग रिकव्हरी प्रोसेस व प्लॅनिंग यशस्वी झाले. सीमकार्ड ॲक्‍टिव्हेट करून व्हेरिफिकेशन पूर्णपणे युजरकडे दिले. अशा प्रकारे हॅक झालेले व्हॉट्‌सॲप अकाउंट युजरला परत मिळाले, अशी माहिती आयटी सल्लागार व वेब डिझायनर वैभव डोंगरे यांनी दिली.

हॅक झालेले व्हॉट्‌सॲप पुन्हा मिळवण्यासाठी आठ दिवसांचा कालावधी लागला. अनेक तांत्रिक अडचणींचा सामनाही करावा लागला. डोंगरे म्हणाले की, व्हॉट्‌सॲप ही एक हायली ऑटोमेटेड व खूप कॉम्प्लेक्‍स सिस्टिम आहे. त्यामुळे रिकव्हरीसाठी उचलले जाणारे एखादे चुकीचं पाऊल आपल्यालाच अडचणीत आणू शकते. कारण सिस्टिमला काही नियम सेट केलेले असतात. त्या नियमांच्या आधारे सिस्टिम हॅकर व ओनर ठरवते. या सगळ्याचा विचार करून हॅकरच्या हातात गेलेले अकाउंट परत मिळवण्यासाठी एक प्लॅन आखला. एक प्रॉपर हॅकिंग रिकव्हरी प्रोसेस तयार करण्यात आली. यात सुद्धा काही शक्‍यता होत्या, की ज्यामुळे हे अकाउंट कायमच हॅकरच्या ताब्यात गेले असते.

हेही वाचा - रोज तेच ते खाऊन कंटाळा आलाय, ट्राय करा आपे पायसम..

हॅकिंगपासून बचाव कसा कराल?
    

• मोबाईल अनोळखी माणसाच्या हातात अजिबात देऊ नका.
• आपल्या व्हॉट्‌सॲपला टू स्टेप व्हेरिफिकेशन असावे.
• फोनवर येणाऱ्या ऑफर्स किंवा नोटिफिकेशन्सबाबत सावध.
• १० मिनिटे विचार करायला किंवा खात्री करायला घ्या. 
• चोर किंवा हॅकर असेल तर तो शक्‍यतो थांबणार नाही.
• हॅकरकडे रोज नवीन-नवीन युक्‍त्या असतात. 
• गुगल प्ले स्टोअरवरून ॲप इन्स्टॉल करताना त्या ॲपचे कार्य काय, हे पाहावे.
• पब्लिशर कोण, इंस्टॉलेशन्स किती, वापरकर्त्यांच्या कंमेंट्‌स हे पाहून ॲप इन्स्टॉल करा.

संपादन - स्नेहल कदम