रत्नागिरी :अरबी समुद्रात चक्रीय स्थिती निर्माण होऊन वार्‍याचा वेग वाढल्याने गुरुवार 18 जूनपर्यंत धो धो पावसाचा इशारा देण्यात आला आहे. कोकणात अतिवृष्टी, तर मध्य महाराष्ट्र, विदर्भ आणि मराठवाड्यात मुसळधार पावसाचा इशारा भारतीय हवामानशास्त्र विभागाने दिला आहे. 

हवामान खात्याचे प्रमुख के.एस. होसाळीकर यांनी याबाबत ट्विट करुन माहिती दिली. पुढील 24 तास मुंबई सह ठाणे, नवी मुंबई, पालघर, रायगड, रत्नागिरी, सिंधुदुर्ग या भागात जोरदार पाउस होईल असा अंदाज असल्याने रेड ते ऑरेंज अलर्ट जाहीर करण्यात आला आहे.

हेही वाचा- ब्रेकिंग -  रत्नागिरीत सापडले आणखी 4 कोरोना पॉझिटिव्ह -

 दरम्यान मंगळवार पासून जिल्ह्यात धो धो पाऊस सुरू झाला आहे. बुधवारी सकाळपासून पावसाच जोर अधिक वाढला आहे. बुधवारी सकाळी मुसळधार पावसाने रत्नागिरी शहरासह जिल्ह्याला झोडपून काढले. हवामान विभागाने दिलेल्या इशाऱ्यानुसार पावसाचा जोर गुरुवार पर्यंत कायम राहणार आहे.
जिल्ह्यात बुधवारी सकाळी 8.30 वाजेपर्यंतच्या चोविस तासात सरासरी 52.22 मिमी पावसाची नोंद झाली. त्यात मंडणगड 9, दापोली 20, खेड 24, गुहागर 53, चिपळूण 62 , संगमेश्वर 147, रत्नागिरी 30, राजापूर 82, लांजा 34 मिमी पाऊस झाला. 

हेही वाचा- भक्ष्याच्या शोधार्थ रस्त्यावर आला, अन् जीवाला मुकला

संगमेश्वर तालुक्यातील शास्त्री आणि सोनवी या नद्यांनी धोक्याची पातळी ओलांडली आहे. संगमेश्वर बाजारपेठ आणि रामपेठ परिसरातील नागरिकांना सावधगिरीचा इशारा देण्यात आला आहे. शास्त्री पूल पिकप शेडच्यामागील डोंगर खचला आणि दरड पिकअप शेडच्यामागे कोसळली. या दरडीला लागून असलेली तीन घरांना धोका निर्माण झाला.  तहसीलदारांच्या सूचनेनुसार दोन घर खाली करण्यास सांगण्यात आले, तर एका कुटूंबाला सकाळपर्यंत स्थलांतरित होण्याच्या सूचना देण्यात आल्या आहेत. पुढील दोन दिवस अधिक मोठ्या प्रमाणात पाऊस पडण्याचा ईशारा हवामान विभागाने दिला आहे. पावसामुळे जिल्ह्यात शेतीची कामे वेगाने सुरू झाली आहेत.