संगमेश्वर ( रत्नागिरी) - हाताच्या बोटावर चालणाऱ्या वेगवान इंटरनेटच्या जमान्यात आता पौरोहित्यालाही आधुनिकतेचा साज चढला आहे. पोथी पुस्तके हातात घेऊन भिक्षुकी करणारे अनेक भटजीकाका अलीकडे अँड्रॉइड मोबाईलचा वापर करत पूजा सांगताना दिसत आहेत. यात वावगे काहीही नसले तरी जीवनातील प्रत्येक क्षेत्रच मोबाईलने व्यापून टाकल्याचे या निमित्ताने समोर आले आहे. 

सोशल मीडियाच्या जमान्यात घर, गाडी, कपडे, जिन्नस अशा गोष्टी आजकाल मोबाईलवरुन बुक केल्या जातात. अलीकडील काळात तर खाणे घरपोच होण्यासाठी मोबाईल इंटरनेटचा वापर वाढला आहे. सोशल मीडियाने जीवनातील बरे-वाईट प्रसंग व्यापून टाकले. गुगल प्ले स्टोअरवर विविध ऍप्लिकेशनच्या माध्यमातून आपल्याला जे हवे ते ऑनलाईन-ऑफलाइन उपलब्ध आहे. मग पौरोहित्य क्षेत्र याला अपवाद कसा ठरेल. कोकणात विशेषत: ग्रामीण भागात आजही पूजा, धार्मिक विधी, उत्तरकार्य विधी असोत सर्वांना तेवढेच महत्त्व असून यासाठी भटजीकाकाच लागतात. हंगामात तर काकांची कमतरता जाणवते. नियमित सरावामुळे बहुतांश भटजीकाकांची स्तोत्र, विधी आदी तोंडपाठ असली तरी गडबडीत काहीही विसरायला झाले तर अडचण नको म्हणून आजकाल सर्रास काका चक्क अँड्रॉइड मोबाईल वापरताना दिसतात. 

हेही वाचा - ...अन् एसटी दरीत कोसळता - कोसळता वाचली 

पूजा साहित्य ऑफलाइनही उपलब्ध 

ग्रामीण भागात नेटवर्कची सोय नसली तरी काकांची अडचण होत नाही, कारण आजकाल गुगल प्ले स्टोअरवर सर्व प्रकारचे पूजा विधी ऑफलाइन पद्धतीने उपलब्ध आहेत. एकदा का जाणकारांकडून ते डाउनलोड करून घेतले की कायमचा प्रश्न मिटतो. त्यामुळे आजकाल गावागावांत लग्न असो वा धार्मिक कार्य, पूजा असो वा होमहवन उपस्थित भटजी काकांनी मोबाईलचा आसरा घेतला तर कुणालाही नवल वाटत नाही. मुंबई-पुण्यासारख्या महानगरामध्ये तर ही पद्धत केव्हाच सुरु झाली आहे. मात्र ग्रामीण भागातही आता हाच पायंडा पडत असल्याने कोकणातील भटजीकाका आता हायटेक होताना दिसत आहेत. 

हेही वाचा - आरे - वारे किनाऱ्याचा पर्यटन विकास अडकला कशात ? 

माबाईल अॅपवर साहित्य उपलब्ध
अनेक ठिकाणी पूजा वा धार्मिक विधीसाठी जाताना पुस्तकांचा विसर पडतो. अशावेळी मोबाईल उपयोगी येतो. बहुतांश पूजा साहित्य मोबाईलवर ऍपमध्ये ऑफलाईन उपलब्ध असल्याने ते आम्हाला फायदेशीर आहे. 
- प्रसाद फाटक, कसबा