Irshalwadi Landslide: रायगडच्या इर्शाळवाडीत दरड कोसळून झालेल्या दुर्घटनेत सुमारे ५० घर मातीच्या ढिगाऱ्याखाली गाडली गेली आहेत. बुधवारी रात्री ११ वाजण्याच्या सुमारास ही दुर्घटना घडली होती. दरम्यान, गुरुवारी पहाटेपासून आत्तापर्यंत इथं अविरतपणे बचावकार्य सुरु होतं.

पण आता हे बचावकार्य तात्पुरतं थांबवण्याचा निर्णय एनडीआरएफनं घेतला आहे. या परिसरात सध्या मुसळधार पाऊस सुरु असल्यानं हे बचावकार्य थांबवण्यात आलं आहे. एबीपी माझानं याबाबत वृत्त दिलं आहे. (Irshalwadi Landslide Relief work temporarily stopped difficulties due to heavy rains)

सध्या या परिसरात बचाव कार्यासाठी प्रतिकूल परिस्थिती आहे. मुसळधार पाऊस पडत असल्यानं एनडीआरएफ, अग्निशमन दल आणि स्थानिक प्रशासनाला बचाव कार्य राबवताना अनेक अडचणींचा सामना करावा लागत आहे. यामुळं आजचं बचावकार्य थांबवण्याचा निर्णय घेण्यात आला आहे. उद्या सकाळी परिस्थिती पाहुन पुन्हा एकदा बचावकार्य सुरु करण्यात येणार असल्याची सुत्रांनी माहिती दिली आहे. (Latest Marathi News)

१२ जणांचा मृत्यू, १०३ बचावले

आज सकाळपासूनच जोरदार मदतकार्य सुरु करण्यात आलं. या दुर्घटनेमध्ये आतापर्यंत १२ जणांचा मृत्यू झाला आहे, तर १०३ जणांना सुखरुप बाहेर काढण्यात आले आहेत. तर अजूनही १५० लोक या ढिगाऱ्याखाली अडकल्याची भीती व्यक्त केली जात आहे. तसेच भारतीय हवामान खात्याच्या अंदाजानुसार रायगड जिल्ह्यात आज व उद्या रेड अलर्ट जाहीर करण्यात आला आहे.

मृतांच्या नातेवाईकांना ५ लाखांची मदत

दरम्यान, शासन प्रत्येक बाबीवर बारकाईनं नजर ठेवून आहे. मृतांच्या नातेवाईकांना पाच लाख रुपयांची मदत देण्यात येणार आहे, तर जखमींवर शासनाच्या वतीने मोफत उपचार करण्यात येणार असल्याची माहिती उपमुख्यमंत्री अजित पवार यांनी विधान परिषदेत दिली.