मालवण ः शिवसेनेचे ज्येष्ठ पदाधिकारी असलेल्या भाई गोवेकरांचा भाऊ रमेश गोवेकर विधानसभेच्या पोटनिवडणुकीत गायब झाला. याबाबत आपण आमदारकीच्या काळात विधानसभेत सातत्याने आवाज उठविला; मात्र काल झालेल्या पत्रकार परिषदेत या भागातून निवडून आलेल्या खासदार विनायक राऊतांना अंकुश राणे आठवतो; पण रमेश गोवेकर आठवत नाही, ही शिवसेनेची एक शोकांतिकाच आहे, अशी टीका माजी आमदार, मनसेचे प्रदेश सरचिटणीस परशुराम उपरकर यांनी आज पत्रकार परिषदेत केली. विधानसभेच्या निवडणूकीपूर्वी बसस्थानक इमारतीचे भूमीपूजन झाले; मात्र त्याचे उद्घाटन केव्हा होणार? खड्डेमय रस्त्यांची दुरूस्ती करणे ही माझी जबाबदारी आहे, असे सांगणार्‍या आमदार वैभव नाईक यांनी दिवाळी आली तरी रस्त्यांच्या कामांना अद्याप सुरवात झालेली नाही. त्यामुळे आमदारांनी आपण अकार्यक्षम आमदार असल्याचे स्पष्ट करावे, अशी टीकाही श्री. उपरकर यांनी केली.
शासकीय विश्रामगृह येथे पत्रकार परिषद झाली. यावेळी तालुकाप्रमुख विनोद सांडव, उपजिल्हाप्रमुख शैलेश अंधारी, विनायक गावडे, विशाल ओटवणेकर, गुरू तोडणकर, निखिल गावडे, देवेंद्र चव्हाण यांच्यासह अन्य पदाधिकारी उपस्थित होते. श्री. उपरकर म्हणाले, "केंद्रातील व राज्यातील सत्ताधारी सध्या वैफल्यग्रस्त झाल्यासारखे वागत आहेत. केंद्र व राज्यातील सरकार हे जनतेला अडचणीत आणि महागाईचे चटके देण्यामागे आहे. आज पेट्रोल, डिझेल दरवाढीचे परिणाम एसटीवर तसेच जीवनावश्यक वस्तूंच्या दरावर झाले आहेत. राज्य शासनाने हे दर कमी करण्यासाठी प्रयत्न करायला हवेत. मुख्यमंत्री म्हणतात सामाजिक उपक्रमातील एसटी, बीएसटी मोठ्या प्रमाणात चालतात. त्यामुळे पेट्रोलचे दर वाढले. दुसर्‍या बाजूला युवासेनेचे कार्यकर्ते सायकल रॅली काढतात.
राज्याने इंधनावरील सेस कमी करावा यासाठीच त्यांचे हे आंदोलन आहे का? असा प्रश्‍न उपस्थित होत आहे. केंद्र सरकारच्या जीएसटीमध्ये पेट्रोल, डिझेल आणि गॅसचा अंतर्भूत करण्यास राज्याने विरोध केला. एकमेकांच्या विरोधात जनता होरपळत आहेत. जनतेला त्याचे चटके बसताहेत. सिंधुदुर्गातील शासकीय वैद्यकीय महाविद्यालयाबाबत पुन्हा त्रुटी काढण्यात आल्या आहेत. त्यामुळे यावर्षीची प्रवेश प्रक्रिया रखडण्याची शक्यता निर्माण झाली आहे. राज्य सरकारने या महाविद्यालयाला मान्यता घेण्यापूर्वी आवश्यक सुविधा निर्माण कराव्यात नंतरच परवानगी घ्यावी. हे करत असतानाच मल्टिस्पेशालिस्ट हॉस्पीटल कधी उभारणार? हेही जाहीर करावे."
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.