Alibaug Monsoon Update : मागील २४ तासांत रायगडमध्ये जोरदार पाऊस पडत आहे. यामुळे रखडलेल्या भातलावणीच्या कामांना वेग आला. पडणारा पाऊस भातपिकासाठी पोषक असल्याने येथील शेतकऱ्यांनी लावणीची लगबग सुरू केली आहे. रायगड जिल्ह्यात आतापर्यंत २६ टक्के भातलावणी झाली आहे.

मागील आठवड्यात पावसाचे प्रमाण कमी झाल्याने लावणीची कामे रखडली होती. तालुका कृषी अधिकाऱ्यांनी दिलेल्या माहितीनुसार सर्वाधिक भातलावणीचे प्रमाण पोलादपूर, सुधागड, कर्जत, खालापूर या तालुक्यांमध्ये आहे. तर सर्वांत कमी प्रमाण अलिबाग, पेण, मुरूड, माणगाव तालुक्यात आहे. दरम्यान, रविवार दुपारपासून पडणाऱ्या पावसाने भातलावणीच्या कामांना वेग आला आहे.

लावणी लावण्यात कुटुंबीय व्यग्र

पोलादपूर : पावसाची रिपरिप सुरू असल्याने दोन दिवसांपासून पोलादपूर तालुक्यातील शेतकरी शेतीच्या कामांमध्ये व्यग्र झाले आहेत. तालुक्यातील ग्रामीण भागामध्ये लावणीला सुरुवात झाली आहे. मजुरांची कमतरता भासत असल्याने सर्व कुटुंबीय शेतीच्या कामात हातभार लावत आहेत. पाऊस समाधानकारक पडत असल्याने शेतकरीही आनंदीत झाले आहेत.

भातलावणीची कामे रखडली होती. सध्या पडणाऱ्या पावसाने खलाटीमध्ये लावणीसाठी बऱ्यापैकी पाणी जमा झालेले आहे. काही शेतकऱ्यांनी भातलावणी आधीच करून घेतल्याने मजूर उपलब्ध आहेत. त्यांच्या मदतीने लावणीची कामे आटोपती घेत आहोत.

- शांताराम पाटील, प्रगतशील शेतकरी, अलिबाग