१० प्रकारच्या फळ, भाजीपाल्याचे उत्पादन

शिपोळेतील शेतकरी काशिनाथ शिंदेंचे कष्ट; १ हेक्टर २६ गुंठे क्षेत्रावर मळा

मंडणगड : तालुक्यात शिपोळे गावच्या खलाटी पाणथळ शेतातून विविध प्रकारची कडधान्ये घेण्याची वर्षानुवर्षाची परंपरा आहे. येथील शेतकरी काशिनाथ धोंडू शिंदे यांनी १ हेक्टर ३६ गुंठे क्षेत्रावर दहा प्रकारच्या भाजीपाला, फळ पिकाची लागवड केली आहे. अनेक पिकांचे यशस्वी प्रात्यक्षिक घेत पारंपरिक शेती करणाऱ्या शेतकऱ्यांपुढे पर्याय दिला आहे.

मंडणगड-बाणकोट मार्गावर शिपोळे गाव आले की आजूबाजूचा हिरवागार परिसर लक्ष वेधून घेतो. येथील अनेक शेतकरी दुबार पिकं घेतात. काशिनाथ शिंदे ही अनेक वर्षांपासून शेतीच्या उत्पन्नातून आर्थिक स्रोत निर्माण करीत आहेत. गतवर्षी बटाटा, वाटाणा पिकाचे यशस्वी उत्पादन घेतले. यावर्षी मिरची, मसूर, कुळीथ, उडीद, मूग, कलिंगड, रताळी, चवळी, मटकी, मेथी अशा दहा प्रकारच्या मिश्र भाजीपालाची १ हेक्टर ३६ गुंठे क्षेत्रावर लागवड केली आहे.

शेतात उत्पादित होणारा भाजीपाला ते वेसवी, देव्हारे या बाजारपेठा व आजूबाजूच्या गावात विक्री करून त्यातून अर्थार्जन करीत आहेत. त्यांच्या या मेहनतीला तालुका कृषी कार्यालयाचे तालुका कृषी अधिकारी सुप्रिया घोडके, मंडळ कृषी अधिकारी दिलीप जाधव, कृषी पर्यवेक्षक सजा उमरोली बी. वाय. ताठे, कृषी सहाय्यक अधिकारी वैभव शेगोकार हे मार्गदर्शन करून प्रोत्साहित करीत आहेत.

''भाजीपाला उत्पन्न घेणाऱ्या शेतकऱ्यांना प्रोत्साहित करून आर्थिक सक्षम करण्यासाठी प्रयत्न आहेत. परिसरातील अनेक शेतकरी चांगल्या पद्धतीने आरोग्यास उपयुक्त अशा भाज्यांचे उत्पादन घेत आहेत.''

- वैभव शेगोकार, कृषी सहाय्यक अधिकारी