चिपळूण ( रत्नागिरी ) - खेड तालुक्‍यातील भेलसई येथून चिपळूणला येणारी एसटी खोल दरीच्या बाजूस घसरली. बसची  बॉडी जमिनीला टेकल्याने बस खोल नदीत कोसळता-कोसळता वाचली. विद्यार्थ्यांसह सुमारे 30 ते 35 प्रवासी बसमध्ये होते. भेलसई येथील एका वळणावर सकाळी आठच्या सुमारास ही घटना घडली. 

चिपळूण आगारातून चिपळूण शेल्डी बस सकाळी पाच वाजता सुटते. आंबडस, भेलसई, शेल्डी, गुणदेमार्गे पुन्हा भेलसईमार्गे चिपळूणला येते. नेहमीप्रमाणे ही बस चिपळूण आगारातून पाच वाजता सुटल्यानंतर आठ वाजता ती भेलसईत आली. भेलसई येथील एका वळणावर बस आली असता समोरून गुरे आडवी आल्याने चालकाने ब्रेक मारला.

हेही वाचा - आघाडी सरकारवर प्रवीण दरेकर यांची ही टीका 

बस घसरली अन्...

दरम्यान बस रस्त्याच्या कडेला घसरत गेली. या वळणाच्या रस्त्यालगत खोल दरीचा भाग आहे. रस्त्याच्या कडेला तीव्र उतार आहे. कडेला कसलीच संरक्षक भिंत नाही. रस्त्याच्या कडेला उतारावर घसरलेली बस एका झाडावर आदळली. शिवाय बसची खालील बॉडी जमिनीला टेकल्याने नशिबाने बस खोल उतारात गेली नाही. अचानकपणे एसटी वळणावरून खाली जात असल्याचे निदर्शनास येताच प्रवाशांना थंडीत घाम फुटला होता.

हेही वाचा - सावंतवाडीतील त्या आत्महत्येमागचे वाढले गूढ 

क्रेनने बस काढली बाहेर

सुदैवाने जमिनीला बॉडी टेकल्याने खोल नदीत बस जाता-जाता वाचली. अन्यथा अनेकांचा जीव धोक्‍यात आला होता. दरम्यान चिपळूण आगारास या घटनेची माहिती मिळताच आगारातील कर्मचारी घटनास्थळी पोहोचले. सकाळपासून एसटी बाहेर काढण्याचे काम सुरू होते. मात्र दुपारी क्रेन आल्यानंतर बस बाहेर काढण्यात आली. या घटनेत सुदैवाने कोणास दुखापत झाली नाही. मात्र मोठ्या घटनेतून बसमधील प्रवासी बचावले आहेत.