मुंबई : गणेशोत्सवानिमित्त कोकणात गावाकडं निघालेल्या नागरिकांना एसटीच्या भोंगळ कारभारामुळं मोठ्या मनस्तापाला सामोरं जावं लागलं आहे. मुंबईतील भांडूप आणि अन्य ठिकाणांहून काल रात्री ९ वाजता सुटलेल्या एसटीच्या बसेस अजूनही महाडमध्येच आहेत. इथल्या पंपावर सीएनजी संपल्यानं तब्बल वीस तास उलटून गेले तरी या बस इथं अडकून पडल्याचं साम टीव्हीच्या सुत्रांनी सांगितलं आहे.

सामच्या वृत्तानुसार, रात्री नऊ वाजता भांडुप आणि अन्य ठिकाणाहून सुटलेल्या गाड्या अजूनही महाडमध्येच आहेत. महाड येथील सीएनजी पंपावर सीएनजी संपला असल्यानं या बस गाड्या सकाळी आठ ते चार वाजेपर्यंत सीएनजी पंपावरच अडकून पडल्या होत्या. यामुळं वैतागलेल्या प्रवाशांनी चांगलाच गोंधळ घातला.

इतका काळ या एकाच ठिकाणी अडकून पडलेल्या नागरिकांना सीएनजी पंपावरील शौचालय देखील वापरायला दिलं नाही. तसंच तब्बल वीस तास उलटून गेल्यामुळं अन्न आणि पाण्यावाचून हे प्रवासी व्याकूळ झाले होते. त्याचबरोबर या मार्गावरील प्रचंड वाहतूक कोंडीमुळं देखील हे प्रवाशी वैतागून गेले होते.