91218

वेंगुर्ले-वायंगणी किनाऱ्यावर
आजपासून कासव महोत्सव

कुडाळ, ता. २४ ः वन विभाग सावंतवाडीमार्फत वायंगणी (ता. वेंगुर्ले) येथे उद्यापासून (ता. २५) दोन दिवसांच्या कासव महोत्सवाचे आयोजन विविध उपक्रमांसह करण्यात आले आहे.
सिंधुदुर्ग जिल्हयातील सर्वच समुद्र किनाऱ्याला कमी-अधिक प्रमाणात दुर्मिळ अशा समुद्री कासवांचा (ओलिव्ह रिडले सी टर्टल) अधिवास आढळून येतो. साधारणतः दरवर्षी ऑक्टोबर ते मे या दरम्यान त्यांचा विनीचा हंगाम असतो. स्वच्छ कमी प्रदूषित आणि कमी मानवी हस्तक्षेप असणाऱ्या किनाऱ्यांची निवड ही कासवे अंडी घालण्यासाठी करतात. अंडी घातल्यानंतर मादी कासवे समुद्रात निघून जातात. त्यानंतर अंड्यांच्या ५० ते ६० दिवसांच्या उबवण कालावधीमध्ये भटकी कुत्रे, कोल्हे, मुंग्या आदींकडून त्यांना धोका असल्याने त्यांचे संरक्षण व संवर्धन सावंतवाडी वनविभाग, स्थानिक कासवमित्र, बीच मॅनेजर यांच्या मदतीने करत असतो. गतवर्षी कुडाळ वनपरिक्षेत्रातील वेंगुर्ले व मालवण तालुक्यांतील समुद्र किनाऱ्यांवर मिळून ३२८ समुद्र कासवांची घरटी संरक्षित करून त्यातून बाहेर पडलेल्या सुमारे २१४४३ पिल्लांना नैसर्गिक अधिवासात मुक्त केल्याची माहिती वनक्षेत्रपाल (कुडाळ) अमृत शिंदे यांनी दिली. कासव संवर्धन व संरक्षणासह त्यांच्या जीवन चक्राबाबत जनजागृती करणाऱ्या कासवमित्रांचा जिल्हाधिकाऱ्यांच्या उपस्थितीत सन्मान करण्यात येणार आहे. या महोत्सवामध्ये नवजात समुद्री कासवांना त्यांचे नैसर्गिक अधिवासात मुक्त करणे, नेचर ट्रेल, मॅग्रुव्ह सफारी तसेच पौराणिक दशावतार (कुर्म अवतार) नाटक आदी उपक्रमांचा समावेश आहे. सहभागी होण्याचे आवाहन वनपरिक्षेत्र अधिकारी शिंदे यांनी केले आहे.