वेताळबांबर्डे-तेलीवाडीत
सर्व्हिस रोडची मागणी
पालकमंत्र्यांना निवेदनः ३० घरांचा थेट महामार्गाशी संपर्क
सकाळ वृत्तसेवा
कुडाळ, ता. १ः मुंबई-गोवा महामार्गावरील वेताळ बांबर्डे-तेलीवाडी येथे सर्व्हिस रोड बनविण्याबाबत पालकमंत्री रवींद्र चव्हाण यांना निवेदन देण्यात आले. पालकमंत्री महामार्गाच्या पाहणीसाठी सिंधुदुर्गात होते. त्यावेळी त्यांनी वेताळ बांबर्डे-तेलीवाडी येथील रहिवाशांच्या समस्या जाणून घेतल्या.
तेलीवाडी येथील नागरिकांनी पालकमंत्र्यांना दिलेल्या निवेदनात म्हटले आहे की, येथील २५ ते ३० घरांचा थेट संपर्क महामार्गाशी येतो. त्यामुळे येथील शेतकरी, विद्यार्थी, वृध्द नागरिक यांना ये-जा करताना जीवितास धोका निर्माण झाला आहे. या ठिकाणी दोन महिन्यांपूर्वी अपघात सुद्धा घडले असून यात एकाचा मृत्यू तर दुसऱ्या व्यक्तीस कायमस्वरूपी अपंगत्व आले. त्यामुळे तेलीवाडी पिकअप ते विद्याधर मांजरेकर यांच्या घरापर्यंत सर्व्हिस रोड आणि फुटपाथ, स्ट्रीट लाईट, गटार या सुविधा उपलब्ध करून द्याव्यात, अशा महत्त्वाच्या मागण्या स्थानिक नागरिकांनी पालकमंत्र्यांना प्रत्यक्ष भेटून निवेदनाद्वारे केली. याबाबत पालकमंत्री चव्हाण यांनी प्रत्यक्ष पाहणी दौऱ्यात प्रांताधिकारी यांना सूचना करून तेलीवाडीवासियांची समस्या दूर करण्याचे आदेश दिले. यावेळी दिनेश शिरवलकर, दिलीप तिवरेकर, अशोक तिवरेकर, ग्रामपंचायत सदस्य रश्मी तिवरेकर, दिव्या तिवरेकर, रघुनाथ शिरवलकर, वर्षा वसंत शिरवलकर, अरविंद बांबर्डेकर, भास्कर गावडे, संकेत कुबल, रुपेश तिवरेकर आदी ग्रामस्थ उपस्थित होते.
-------------------
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.