पान ५ साठी, संक्षिप्त

पोफळीत ‘दप्तराविना शाळा’ उपक्रम
चिपळूण ः पोफळी प्राथमिक शाळेत शनिवारी (ता. ३०) एक दिवस दप्तराविना शाळा हा उपक्रम राबविण्यात आला. यानिमित्ताने शाळेतील सभागृहात शैक्षणिक साहित्याचे प्रदर्शन भरविण्यात आले होते. या शैक्षणिक साहित्यामध्ये मराठी, गणित, इंग्रजी, परिसर, सेमी इंग्रजी व पेटंट या विषयांच्या उत्कृष्ट साहित्याचा समावेश होता. मुख्याध्यापक महेंद्र कापडी यांच्या हस्ते प्रदर्शनाचे उद्घाटन करण्यात आले. प्रशालेतील शिक्षकांनी विद्यार्थ्यांना शैक्षणिक साहित्य प्रत्यक्ष दाखवून त्याची माहिती दिली. यानंतर प्रतिभा धुमाळ, अशोक मिसाळ व प्रशालेचे माजी शिक्षक आशिष मांडवकर यांनी विविध प्रकारची अभिनय गीते सादर करताना विद्यार्थ्यांचाही सहभाग घेतला. प्रदर्शनाची मांडणी शिक्षिका साधना गायकवाड व मनीषा नाईक, सेविका सरिता मानकर व पूजा लाड यांच्या मदतीने ज्येष्ठ शिक्षिका शिवानी शिंदे यांच्या मार्गदर्शनाखाली केली.

राष्ट्रवादीतर्फे ‘श्री गणेशा शिक्षणाचा अभियान’
चिपळूण : शाळा आणि शिक्षणापासून वंचित असणाऱ्या मुमुलांना शिक्षणासाठी प्रेरणा देऊन शाळेत आणण्यासाठी ''श्री गणेशा शिक्षणाचा अभियान'' महिला राष्ट्रवादी कॉंग्रेसतर्फे राबविला जात आहे. याच अभियानांतर्गत रत्नागिरी जिल्हा राष्ट्रवादी कॉंग्रेस महिलांच्या वतीने जिल्हाध्यक्षा चित्राताई चव्हाण यांच्या नेतृत्त्वाखाली खेड तालुक्यातील, धामणंद येथे आदिवासी (कातकरी) समाजातील मुलांना शिक्षणासाठी प्रेरित करण्यात आले. धामणंदचे सरपंच राजू वाघमारे यांना भेटून श्रीविद दादा हिलम, रोहित रोशन पवार यांना मुलांना अंगणवाडी शाळेत येण्यास प्रेरित करण्यात आले. चित्रा चव्हाण यांच्यासमवेत यशवंत विद्यालय धामणंद, पंधरागाव विभाग शिक्षण संस्थेचे अध्यक्ष अनंतराव पालांडे, तंटामुक्ती अध्यक्ष रवींद्र पालांडे, धामणंद सेवासंघ मुंबई उपाध्यक्ष सुभाष म्हापदी, माजी सरपंच विष्णू कदम, संजय सुर्वे विलास उतेकर, ग्रामपंचायत सदस्य सीमा पालांडे आदी उपस्थित होते.

३५०१०
‘तायक्वॉंदो’साठी पंच म्हणून पातकरची निवड
चिपळूण : नोएडा येथे होणाऱ्या खुल्या तायक्वांदो राष्ट्रीय स्पर्धेसाठी चिपळुणातील दिशा दीपक पातकर हिची राष्ट्रीय पंच म्हणून निवड करण्यात आली आहे. राष्ट्रीय संघटनेचे महासचिव ॲड. आर. डी. मंगेशकर, आंतरराष्ट्रीय पंच नवीनचंद्र, टी. एफ. आयचे सहसचिव मिलिंद पठारे यांच्याकडून पातकर हिची नियुक्ती करण्यात आली आहे. दिशा पाटकर चिपळूण तालुका तायक्वांदो अकादमीचे सचिव प्रवीणकुमार आवळे यांच्या मार्गदर्शनाने तायक्वांदोमध्ये राष्ट्रीय पंच परीक्षा पास झाली आहे. याबद्दल राज्य संघटनेचे अध्यक्ष डॉक्टर अविनाश बारगजे, महासचिव मिलिंद पठारे, उपाध्यक्ष प्रवीण बोरसे, सचिव सुभाष पाटील, उपाध्यक्ष धुलिचंद मेश्राम, जिल्हा संघटनेचे अध्यक्ष व्यंकटेश्वरराव कररा आदींनी तिचे अभिनंदन केले.

पोफळीच्या विद्यार्थ्यांनी केले सहस्त्रावर्तने
चिपळूण ः पोफळी येथील महानिर्मितीच्या महाराजासमोर पोफळी प्राथमिक शाळेच्या विद्यार्थ्यांनी अथर्वशीर्षाचे सहस्त्रावर्तन सादर केले. यामध्ये २०० विद्यार्थ्यांनी सहभाग घेतला होता. विद्यार्थ्यांबरोबरच शिक्षक, पालक तसेच महानिर्मिती गणेश मंडळातील सदस्यांनी सहभाग घेतला. अतिशय सुमधूर आवाजात अथर्वशीर्षाचे पठण केले. यानंतर एकत्रित आरती घेऊन विद्यार्थी तसेच उपस्थितांना दूध व केळीचा प्रसाद वाटप करण्यात आला. कार्यक्रमासाठी मुख्याध्यापक महेंद्र कापडी, माध्यमिक विभागाचे मुख्याध्यापक शरद सोळुंके, श्री. काणेकर, श्री. मिसाळ, श्री. आंबवकर, श्री. देशमाने, सौ. गायकवाड आदी उपस्थित होते.

चिपळूण ब्राह्मण संघाला देणगी
चिपळूण ः येथील युनायटेड इंग्लिश स्कूलचे माजी क्रीडा शिक्षक आणि ब्राह्मण सहाय्यक संघ चिपळूणचे विश्वस्त रमेश गजानन आगवेकर यांनी संघाच्या सुवर्ण महोत्सवी वर्षानिमित्त संघाला पन्नास हजार रुपयाचा धनादेश संघाचे कार्याध्यक्ष अविनाश पोंक्षे आणि खजिनदार महेश देवधर यांच्याकडे सुपूर्द केला. गेली अनेक वर्षे संघाच्या संचालक मंडळात आगवेकर कार्यरत आहेत.